ചെന്നൈ: സനാതന ധർമ്മത്തിന്റെ മൂല്യം കുട്ടികൾക്ക് പകർന്ന് കൊടുക്കുന്നതിനായി പുതിയ പദ്ധതിയുമായി തിരുമല തിരുപ്പതി ദേവസ്വം. പദ്ധതിയുടെ ഭാഗമായി തിരഞ്ഞെടുക്കപ്പെടുന്ന കുട്ടികൾക്ക് ഭഗവദ്ഗീത വിതരണം ചെയ്യും. തിരുമല തിരുപ്പതി ദേവസ്വം ബോർഡ് ചെയർമാൻ ഭൂമന കരുണാകർ റെഡ്ഡിയാണ് കഴിഞ്ഞ ദിവസം പദ്ധതിയെ കുറിച്ചുള്ള വിശദവിവരം പങ്കുവെച്ചത്.
സെപ്തംബർ നാലിന് തിരുമല അന്നമയ്യ ഭവനിൽ വിളിച്ചുചേർത്ത ബോർഡ് യോഗത്തിലാണ് പദ്ധതി നടപ്പിലാക്കാൻ തീരുമാനമായത്. സനാതന ധർമ്മം പ്രോത്സാഹിപ്പിക്കുന്നതിന്റെ ഭാഗമായി തിരുപ്പതിയിൽ 600 കോടി രൂപയുടെ തീർത്ഥാടന കേന്ദ്രങ്ങൾ നിർമ്മിക്കാനും തിരുമല തിരുപ്പതി ദേവസ്വം തീരുമാനിച്ചു. 20,000 തീർത്ഥാടകരെ ഉൾക്കൊള്ളാൻ സാധിക്കുന്ന തരത്തിലാണ് തീർത്ഥാടന കേന്ദ്രങ്ങൾ നിർമ്മിക്കാൻ പദ്ധതിയിടുന്നത്.
തമിഴ്‌നാട് മന്ത്രി ഉദയനിധി സ്റ്റാലിന്റെ സനാതന ധർമ്മത്തിനെതിരായുള്ള പരമാർശത്തിൽ ഭൂമന കരുണാകർ റെഡ്ഡിയും പ്രതികരിച്ചു. ‘സനാതന ധർമ്മം എന്നതൊരു ജീവിതരീതിയാണ്. ഇതറിയാതെ ജാതി പറഞ്ഞ് സനാതന ധർമ്മത്തെ വിമർശിക്കുന്നത് സമൂഹത്തിൽ അശാന്തി സൃഷ്ടിക്കും. ഇത് വിമർശകർക്ക് അത്ര നല്ലതല്ല’ അദ്ദേഹം പറഞ്ഞു. സനാതന ധർമ്മത്തെ കൂടുതൽ ശക്തമാക്കാനുള്ള പ്രവർത്തനങ്ങൾക്ക് ദേവസ്വം നേതൃത്വം നൽകണമെന്നാണ് ബോർഡിന്റെ തീരുമാനം.
Comments