സെപ്റ്റംബർ മൂന്ന് സനാതന ധർമ്മ ദിനമായി പ്രഖ്യാപിച്ച് അമേരിക്കൻ നഗരം. കെന്റക്കിയിലെ ലൂയിസ്വില്ല നഗരമാണ് സനാതന ധർമ്മ ദിനം പ്രഖ്യാപിച്ചത്. മേയർ ക്രെയ്ഗ് ഗ്രീൻബെർഗ് പ്രഖ്യാപനം നടത്തിയത്. കെന്റക്കി നഗരത്തിലെ ക്ഷേത്രത്തിൽ നടന്ന മഹാകുംഭ അഭിഷേകത്തിനിടെ നടന്ന ചടങ്ങിൽ ഡെപ്യൂട്ടി മേയർ ബാർബറ സെക്സ്റ്റൺ സ്മിത്ത് ഔദ്യോഗിക പ്രഖ്യാപനം വായിച്ചു. ശ്രീ ശ്രീ രവിശങ്കർ, ചിദാനന്ദ് സരസ്വതി, പരമാർത്ഥ നികേതൻ പ്രസിഡന്റ് ഋഷികേശ്, ഭഗവതി സരസ്വതി തുടങ്ങിയ ആത്മീയ നേതാക്കൾ ചടങ്ങിൽ പങ്കെടുത്തു.
കെന്റക്കിയിലെ ഹിന്ദു ക്ഷേത്രത്തിന്റെ പുനഃപ്രതിഷ്ഠയും മഹാകുംഭ അഭിഷേകവും മനോഹരമായെന്ന് സ്വാമി ചിദാനന്ദ് സരസ്വതി പറഞ്ഞു. ചടങ്ങിന്റെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവെക്കുയും ചെയ്തു. സനാതന ധർമ്മ ദിനമായി സെപ്റ്റംബർ മൂന്ന് ലൂയിസ്വില്ലെ മേയറുടെ പ്രഖ്യാപനം വളരെ ശ്രദ്ധേയമാണെന്നും ഭാരതീയ സംസ്കാരത്തിന്റെ മഹത്തായ യാത്രയിലെ അതിശയകരമായ ഒരു അധ്യായം ആരംഭിച്ചുവെന്നും അദ്ദേഹം കൂട്ടിച്ചേർത്തു.
തമിഴ്നാട് മുഖ്യമന്ത്രിയുടെ മകൻ ഉദയനിധി സ്റ്റാലിന്റെ സനാതന ധർമ്മ പരാമർശത്തിന് പിന്നാലെയാണ് അമേരിക്കൻ നഗരത്തിന്റെ വാർത്തകൾ സമൂഹമാദ്ധ്യമങ്ങളിൽ പ്രചരിക്കുന്നത്. സനാതന ധർമ്മത്തെ ഉന്മൂലനം ചെയ്യണമെന്നായിരുന്നു ഉദയനിധിയുടെ ആഹ്വാനം. ഉദയനിധിയുടെ വംശീയ പരാമർശത്തെ വിമർശിച്ച് നിരവധിപേരാണ് രംഗത്ത് വന്നത്. സാംക്രമിക രോഗങ്ങളായ ഡെങ്കി, മലേറിയ എന്നിവയോട് താരതമ്യപ്പെടുത്തുകയും അതിനെ വെറുതെ എതിർത്താൽ പോര ഉന്മൂലനം ചെയ്യണമെന്നായിരുന്നു ഉദയനിധിയുടെ പരാമർശം.
