ന്യൂഡൽഹി: ജി20 ഉച്ചകോടിക്ക് മുന്നോടിയായി പ്രധാനമന്ത്രി നരേന്ദ്രമോദിയുമായി യുഎസ് പ്രസിഡന്റ് ജോ ബൈഡൻ കൂടിക്കാഴ്ച നടത്തി. പ്രധാനമന്ത്രിയുടെ ഡൽഹിയിലെ വസതിയായ ലോക് കല്യാൺ മാർഗിലാണ് ഇരുവരുടെയും കൂടിക്കാഴ്ച. ഇന്ത്യയും യുഎസും തമ്മിലുള്ള ഉഭയകക്ഷി ബന്ധം കൂടുതൽ ദൃഢമാക്കുന്നതിനുളള ചർച്ചകളാണ് നടന്നത്.
സാമൂഹിക, സാമ്പത്തിക നയതന്ത്ര മേഖലകളിൽ ഇരുരാജ്യങ്ങളും തമ്മിലുളള സഹകരണം കൂടുതൽ ശക്തമാക്കുമെന്ന് പ്രധാനമന്ത്രിയുടെ ഓഫീസ് അറിയിച്ചു. നരേന്ദ്രമോദിയും ജോ ബൈഡനും തമ്മിൽ കൂടിക്കാഴ്ച നടത്തിയതിന്റെ ദൃശ്യങ്ങളും പ്രധാനമന്ത്രിയുടെ ഓഫീസ് സമൂഹമാദ്ധ്യമങ്ങളിൽ പങ്കുവച്ചു.
ജെറ്റ് എഞ്ചിനുകൾക്കുള്ള കരാർ, പ്രെഡേറ്റർ ഡ്രോണുകളുടെ സംഭരണം, 5ഏ, 6ഏ നെറ്റ്വർക്കുകൾ പോലുള്ള നിർണായക സാങ്കേതികവിദ്യകളുടെ സഹകരണം എന്നിവ ഉൾപ്പെടെ നിരവധി വിഷയങ്ങൾ ഇരു ലോകനേതാക്കളും ചർച്ച ചെയ്തു. ഇന്ന് വൈകിട്ട് ആറരയോടെ ഐജിഐ വിമാനത്താവളത്തിലെത്തിയ ജോ ബൈഡനെ റോഡ് ഗതാഗത, ഹൈവേ സഹമന്ത്രി വി.കെ സിംഗാണ് സ്വീകരിച്ചത്.
‘ബൈഡനുമായുളള കൂടിക്കാഴ്ച വളരെ ഫലപ്രദമായിരുന്നു. ഇന്ത്യയും യുഎസ്എയും തമ്മിലുള്ള സാമ്പത്തികവും ഇരുരാജ്യങ്ങളിലെ ജനങ്ങൾ തമ്മിലുള്ള ബന്ധവും ദൃഢമാകുന്നതിനുളള കാര്യങ്ങളടക്കമുള്ള വിവിധ വിഷയങ്ങൾ ചർച്ചയായി. ആഗോള നന്മയ്‌ക്കായി ഇരുരാജ്യങ്ങളും തമ്മിലുളള സൗഹൃദം വലിയ പങ്ക് വഹിക്കുന്നുണ്ടെന്നും’ പ്രധാനമന്ത്രി ട്വിറ്ററിൽ കുറിച്ചു.
Comments