സംസ്ഥാനത്ത് തദ്ദേശ വോട്ടർപട്ടികയുടെ കരട് പ്രസിദ്ധീകരിച്ചു; ഈ മാസം വരെ പേര് ചേർക്കാം

തിരുവനന്തപുരം: സംസ്ഥാനത്തെ 941 ഗ്രാമപഞ്ചായത്തുകൾ, 87 മുൻസിപ്പാലിറ്റികൾ, ആറ് കോർപ്പറേഷനുകൾ എന്നിവയുടെ കരട് വോട്ടർ പട്ടിക സംസ്ഥാന തിരഞ്ഞെടുപ്പ് കമ്മീഷൻ പ്രസിദ്ധീകരിച്ചു. കരട് വോട്ടർ പട്ടികയിൽ ആകെ 2,76,70,536 വോട്ടർമാരാണ് ഉള്ളത്. ഇവരിൽ 1,31,78,517 പുരുഷന്മാരും 1,44,81,779 സ്ത്രീകളും 240 ട്രാൻസ്‌ജെൻഡേഴ്‌സുമാണ് ഉൾപ്പെടുന്നത്.

നിലവിൽ പ്രസിദ്ധീകരിച്ച വോട്ടർ പട്ടികയിൽ ഉൾപ്പെടാത്തവർക്ക് പേര് ചേർക്കുന്നതിനായി സെപ്റ്റംബർ 23-വരെ ഓൺലൈൻ മുഖേന അപേക്ഷ സമർപ്പിക്കാവുന്നതാണ്. 2023 ജനുവരി ഒന്നിനോ അതിന് മുമ്പോ 18 വയസ് പൂർത്തിയായവർക്കാണ് ലിസ്റ്റിൽ പേര് ചേർക്കാൻ അവസരമുള്ളത്. വോട്ടർ പട്ടികയിലെ വിവരങ്ങളിൽ ഭേദഗതിയോ സ്ഥാനമാറ്റമോ വരുത്തുന്നതിനും ഓൺലൈൻ മുഖേന അപേക്ഷാ നൽകാൻ സാധിക്കും.

ഓൺലൈൻ അപേക്ഷകർ സംസ്ഥാന തിരഞ്ഞെടുപ്പ് കമ്മീഷന്റെ ഔദ്യോഗിക വെബ്‌സൈറ്റായ sec.kerala.gov.in-ൽ ആണ് രജിസ്റ്റർ ചെയ്യേണ്ടത്. വോട്ടർ പട്ടികയിൽ നിന്ന് പേര് ഒഴിവാക്കുന്നതിനായി ഓൺലൈനിൽ രജിസ്റ്റർ ചെയ്ത് പ്രിന്റ്ഔട്ട് നേരിട്ടോ തപാൽ മുഖേനയോ ഇലക്ടറൽ രജിസ്‌ട്രേഷൻ ഓഫീസർക്ക് സമർപ്പിക്കേണ്ടത്.