മലപ്പുറം: വൈദേശിക മാനസികാവസ്ഥയെ ഇല്ലാതാക്കി നമ്മുടെ രാഷ്ട്രമായ ഭാരതത്തിന്റെ സംസ്കാരത്തെ ഉൾക്കൊള്ളുന്ന മാനസികാവസ്ഥയിലേക്ക് ജനങ്ങളെ എത്തിക്കുക എന്നതാണ് ഭാരതം എന്ന പേര് പ്രചരിപ്പിക്കുന്നതിന്റെ കാതൽ എന്ന് പ്രജ്ഞാ പ്രവാഹ് ദേശീയ നിർവാഹക സമിതി അംഗം ഡോ.സദാനന്ദ ദാമോദർ സപ്രെ.
ഇന്നും വൈദേശിക മാനസികാവസ്ഥയുള്ളവരാണ് ഭാരതമെന്ന ദേശീയ കാഴ്ചപ്പാടിനെ എതിർക്കുന്നതെന്നും അദ്ദേഹം ചൂണ്ടിക്കാട്ടി. ഇന്ത്യ ആൻറ് ഭാരത് കൺസെപ്റ്റ് ആൻറ് പെർസിപ്ഷൻ എന്ന വിഷയത്തിൽ ഭാരതീയ വിചാരകേന്ദ്രം മലപ്പുറം മഞ്ചേരിയിൽ സംഘടിപ്പിച്ച സംവാദ സദസ്സിൽ സംസാരിക്കുകയായിരുന്നു ഡോ.സദാനന്ദ ദാമോദർ സപ്രെ.
‘ലോകത്തിലെ വിവിധ സംസ്കാരങ്ങളിൽ നിന്ന് നന്മകളെ സ്വീകരിച്ച് തുടർച്ചയായി വളർന്നുകൊണ്ടിരിക്കുന്നതാണ് ഭാരതീയ സംസ്കാരം അഥവാ സനാതന ധർമ്മം. ഒന്നിനേയും അന്യമായി കണ്ടവരല്ല ഭാരതീയർ. ഭാരതീയ ജ്ഞാന പാരമ്പര്യത്തിന് അനുസൃതമായി ചിന്തിക്കുകയും പ്രവർത്തിക്കുകയും ചെയ്യുമ്പോഴേ യഥാർത്ഥ ഭാരതമെന്ന സങ്കൽപ്പത്തിലേക്ക് നമുക്ക് പൂർണ്ണമായി എത്താനാകൂ’- എന്ന് ഡോ.സദാനന്ദ ദാമോദർ സപ്രെ വ്യക്തമാക്കി.
