തിരുവനന്തപുരം; വിഴിഞ്ഞം തുറമുഖത്തിന് ഔദ്യോഗിക പേരായി. തുറമുഖത്തിന്റെ ലോഗോയും മുഖ്യമന്ത്രി പ്രകാശനം ചെയ്തു.വിഴിഞ്ഞം ഇന്റര്നാഷണല് സീപോര്ട്സ് തിരുവനന്തപുരം എന്ന പേരില് ഇനി അഭിമാന പദ്ധതി അറിയപ്പെടും. തുറമുഖത്തിന്റെ പേരില് തിരുവനന്തപുരം ഉള്പ്പെടുത്തണം എന്ന ആവശ്യം ശക്തമായിരുന്നു. തിരുവനന്തപുരത്തെ ഉള്പ്പെടുത്തുമ്പോള് വിഴിഞ്ഞത്തെ ഒഴിവാക്കരുതെന്നും അഭിപ്രായമുണ്ടായിരുന്നു. ഇതെല്ലാം പരിഗണിച്ചാണ് പേരിടല് പൂര്ത്തിയാക്കിയത്.
അന്താരാഷ്ട്ര ബ്രാന്ഡിംഗ് സാദ്ധ്യതകള് ലക്ഷ്യമിട്ടാണ് ലോഗോ ഡിസൈനിംഗ്. രാജ്യത്തെ ഏറ്റവും മികച്ച തുറമുഖമായി വിഴിഞ്ഞത്തെ ഉയര്ത്തുകയാണ് ലക്ഷ്യമെന്ന് മുഖ്യമന്ത്രി പിണറായി വിജയന് പറഞ്ഞു.ചടങ്ങില് സ്ഥലം എംഎല്എയെയും എംപിയെയും ക്ഷണിക്കാത്തതില് അതൃപ്തി പ്രകടിപ്പിച്ചിരുന്നെങ്കിലും എം.എൽ.എ എം.വിന്സെൻ്റ് പേര് പ്രഖ്യാപനത്തിനെത്തി.
ചൈനയില് നിന്ന് പുറപ്പെട്ട മദര്ഷിപ്പ് ഒക്ടോബര് നാലിന് വിഴിഞ്ഞത്ത് നങ്കൂരമിടും. വിഴിഞ്ഞത്തെത്തുന്ന ആദ്യ കപ്പലാകുമിത്. തുറമുഖത്തിന്റെ പ്രവര്ത്തനങ്ങള്ക്കാവശ്യമായ ക്രെയിനുമായാണ് മദര്ഷിപ്പ് എത്തുന്നത്.
