ഉപയോക്താക്കൾക്ക് പ്രയോജനകരമാകും വിധത്തിൽ തുടരെ തുടരെ വാട്ട്‌സ്ആപ്പ് പുതിയ അപ്‌ഡേറ്റുകൾ അവതരിപ്പിക്കുകയാണ്. ഇപ്പോഴിതാ ഇന്ത്യൻ ഉപഭോക്താക്കൾക്ക് പണമിടപാട് നടത്താൻ കൂടുതൽ മികച്ച സൗകര്യം ഒരുക്കിയിരിക്കുകയാണ് കമ്പനി. ഇന്ത്യയിൽ നിന്നുമുള്ള വരുമാനം വർദ്ധിപ്പിക്കുന്നതിന്റെ ഭാഗമായാണ് മെറ്റ പുതിയ ഫീച്ചർ അവതരിപ്പിച്ചിരിക്കുന്നത്. വാട്ട്‌സ്ആപ്പിൽ നേരത്തെ തന്നെ പേയ്‌മെന്റ് സംവിധാനം നിലവിലുണ്ട്. എന്നാൽ പുതിയ അപ്‌ഡേറ്റിൽ ബിസിനസ് അക്കൗണ്ടുകൾക്ക് ഉപകാരപ്രദമാകും വിധത്തിലുള്ള ഫീച്ചറാണ് അവതരിപ്പിച്ചിരിക്കുന്നത്.
പുതിയ അപ്‌ഡേറ്റിൽ വാട്ട്‌സ്ആപ്പ് ബിസിനസ് അക്കൗണ്ടുകൾക്ക് അവർ നൽകുന്ന സേവനങ്ങൾക്കുള്ള തുക ചാറ്റ് മുഖേന തന്നെ സ്വീകരിക്കുന്നതിനുള്ള പ്രത്യേക സൗകര്യമാണ് അവതരിപ്പിച്ചിരിക്കുന്നത്. യുപിഐ ഇടപാടിന് പുറമേ പേയു, റേസർ പേ എന്നിവയുമായി സഹകരിച്ചാണ് ക്രെഡിറ്റ്, ഡെബിറ്റ് കാർഡുകൾ, നെറ്റ്ബാങ്കിംഗ് എന്നിവയിലൂടെയും പണമിടപാട് നടത്താനാകും. മറ്റെല്ലാ യുപിഐ ആപ്പുകൾ ഉപയോഗിച്ചും പണം നൽകാനാകും എന്നതാണ് ഇതിന്റെ സവിശേഷത. പുതിയ സംവിധാനം എത്തുന്നതോടെ ഉപഭോക്താക്കൾക്ക് വാട്ട്‌സ്ആപ്പ് മുഖേന ഇന്ത്യൻ വാണിജ്യ സ്ഥാപനങ്ങളുമായി വളരെ വേഗത്തിൽ പണമിടപാട് നടത്താൻ സാധിക്കുമെന്ന് മാർക്ക് സക്കർബർഗ് വ്യക്തമാക്കി.
ഇതിന് പുറമേ വാട്ട്‌സ്ആപ്പ്, ഇൻസ്റ്റഗ്രാം, ഫെയ്‌സ്ബുക്ക് അക്കൗണ്ടുകളുള്ള വാണിജ്യ സ്ഥാപനങ്ങൾക്ക് മെറ്റ വേരിഫൈഡ് അക്കൗണ്ട് നൽകും. വേരിഫൈഡ് ബാഡ്ജ് ഈ അക്കൗണ്ടുകൾക്ക് ഉണ്ടാകും. ഇവർക്ക് മെറ്റയുടെ പ്രത്യേക പിന്തുണ ലഭിക്കുകയും വ്യാജ അക്കൗണ്ടുകൾ തടയുകയും ചെയ്യും. ഉപഭോക്താക്കൾക്ക് വാണിജ്യ സ്ഥാപനങ്ങളെ വളരെ എളുപ്പത്തിൽ കണ്ടെത്താനുള്ള സൗകര്യവും സജ്ജമാക്കും. വാട്‌സ്ആപ്പ് ഫ്‌ളോസ് എന്ന പുതിയ സംവിധാനത്തിലൂടെ വാണിജ്യ സ്ഥാപനങ്ങൾക്ക് ഉപഭോക്താക്കൾക്ക് ആവശ്യാനുസരണം ചാറ്റുകൾ കസ്റ്റമൈസ് ചെയ്യാനാകും.
