തിരുവനന്തപുരം: തിരുവനന്തപുരം മെഡിക്കൽ കോളേജിൽ കിടപ്പ് രോഗികൾക്കുള്ള പാൽ വിതരണം മിൽമ ഇന്ന് നിർത്തും. 1 കോടി 19 ലക്ഷം രൂപ കുടിശിക നൽകാത്തതിനെ തുടർന്നാണ് മിൽമ പാൽ വിതരണം അവസാനിപ്പിച്ചത്. ഈ കഴിഞ്ഞ മെയ് 22 മുതലുള്ള കുടിശികയാണ് മിൽമയ്ക്ക് ലഭിക്കാനുള്ളത്. ഇതുവരെയും വകുപ്പ് മന്ത്രിയുടെ ഭാഗത്ത് നിന്നുമുള്ള ഇടപെടൽ ഉണ്ടായിട്ടില്ല.
മെഡിക്കൽ കോളേജിൽ കിടത്തി ചികിത്സിക്കുന്ന രോഗികൾക്കാണ് എല്ലാ ദിവസവും ഒരു നേരം പാൽ നൽകിയിരുന്നത്. 500 മില്ലി ലിറ്ററിന്റെ ആയിരം പാക്കറ്റുകളാണ് വിതരണം ചെയ്ത് വരുന്നത്. മെയ് 22 മുതലുള്ള കുടിശിക അടയ്ക്കണമെന്ന് ആവശ്യപ്പെട്ട് മെഡിക്കൽ കോളേജ് സൂപ്രണ്ട് ഉൾപ്പെടെയുള്ളവർക്ക് അഞ്ച് തവണ കത്ത് അയച്ചിരുന്നു. എന്നാൽ കത്തിന് ഒരു പ്രതികരണം ലഭിച്ചിരുന്നില്ല. ഇതിന് പിന്നാലെയാണ് മിൽമയുടെ നീക്കം. മുമ്പ് നടന്നിരുന്ന ബ്രെഡ് വിതരണവും മെഡിക്കൽ കോളേജിൽ ഇപ്പോൾ നടക്കുന്നില്ല.
