ആലപ്പുഴ: ചേർത്തല കോടതിയിൽ നാത്തൂന്മാർ തമ്മിൽ കയ്യാങ്കളി. വിവാഹമോചനവുമായി ബന്ധപ്പെട്ട് കോടതിയിൽ എത്തിയതിന് പിന്നാലെയാണ് ഇരുവരും തമ്മിൽ പരസ്യമായി സംഘർഷമുണ്ടാകുന്നത്. ഭാര്യയും ഇവരുടെ ഭർത്താവിന്റെ സഹോദരിയുമാണ് പരസ്പരം തമ്മിലടിച്ചത്. വിവാഹോചനത്തിനൊടുവിൽ കുഞ്ഞിനെ ഭർത്താവിന് കൈമാറണമെന്ന് കോടതി ഉത്തരവിട്ടിരുന്നു. ഭർത്താവിന്റെ സഹോദരി കുഞ്ഞിനെ വാങ്ങുന്നതിനിടെയാണ് നാത്തൂന്മാർ തമ്മിൽ അടിയായത്.
കോടതി വളപ്പിൽ വെച്ച് നടന്ന സംഘർഷത്തിൽ പോലീസ് കേസെടുത്തു. കോടതി വളപ്പിൽ ഇരവരും തമ്മിൽ തല്ലുന്നത് ഇത് നാലാം തവണയാണ്. കുട്ടിയെ കാണിക്കുന്നതുമായി ബന്ധപ്പെട്ട തർക്കമാണ് സംഘർഷത്തിൽ അവസാനിച്ചത്. ഏറെ നാളത്തെ പ്രണയത്തിന് ശേഷം വിവാഹിതരായതാണ് ഇവർ. ഇരുവരും തമ്മിലുള്ള പ്രശ്‌നവും കുടുംബവഴക്കുമാണ് തമ്മിൽ തല്ലിൽ കലാശിച്ചത്. ഇവർക്ക് ഏഴും നാലും വയസുള്ള രണ്ട് മക്കളാണ് ഉള്ളത്.
ഭർത്താവും ഭാര്യയുടെ അച്ഛനും തമ്മിലുള്ള പ്രശ്നമാണ് വിവാഹമോചനം വരെ എത്തിയതെന്ന് അഭിഭാഷകർ പറയുന്നത്. ഒരു കടമുറിയുമായി ബന്ധപ്പെട്ട തർക്കമായിരുന്നു തുടക്കം. പിന്നീട് ഇതേ ചൊല്ലി നിരവധി കേസുകൾ ഉണ്ടായതായും അഭിഭാഷകർ പറയുന്നു. കുഞ്ഞിനെ കാണണമെന്ന് പിതാവ് കോടതിയിൽ ആവശ്യപ്പെട്ടിരുന്നു. അതുമായി ബന്ധപ്പെട്ട തർക്കമാണ് അടിപിടിയിലായത്.
