ജിമെയിലിന്റെ ഇൻബോക്‌സിലെത്തുന്ന അനാവശ്യ മെയിലുകൾ എപ്പോഴും ഉപയോക്താക്കൾക്ക് ശല്യമാകാറുണ്ട്. ഇത് നീക്കം ചെയ്യുക എന്നത് വളരെ പ്രയാസപ്പെട്ട കാര്യമാണ്. ഇപ്പോഴിതാ ഈ പ്രയാസം മറികടക്കുന്നതിനായി പുതിയ ഫീച്ചർ അവതരിപ്പിച്ചിരിക്കുകയാണ് ഗൂഗിൾ. ജിമെയിൽ ആപ്പ് ഉപയോഗിക്കുന്നവർക്ക് ഇനി 50 ഇമെയിലുകൾ വരെ തിരഞ്ഞെടുത്ത് ഒറ്റ ക്ലിക്കിൽ തന്നെ നീക്കം ചെയ്യാനാകും.
ജിമെയിൽ ആൻഡ്രോയിഡ് 2023.08.20.561750975 എന്ന വേർഷനിലാണ് പുതിയ ഫീച്ചർ ലഭ്യമാകുക. സാംസങ് ഗാലക്‌സി, പിക്‌സൽ ഉപയോക്താക്കൾക്കും ആൻഡ്രോയിഡ് 13,14 വേർഷനുകളിലും ഈ ഫീച്ചർ ലഭ്യമായിട്ടുണ്ട്.വരും ദിവസങ്ങളിൽ ഇത് കൂടുതൽ ഫോണിലേക്ക് ലഭിച്ചേക്കുമെന്നാണ് ഗൂഗിൾ അറിയിച്ചത്.
ജിമെയിൽ ആപ്പിൽ സെലക്ട് ഓൾ എന്ന ലേബലിലാണ് ഫീച്ചർ ലഭ്യമാകുക. എന്നാൽ ആദ്യ ഘട്ടത്തിൽ 50 മെയിലുകളാണ് സെലക്ട് ചെയ്യാനാകുക. ഇവയിൽ നീക്കം ചെയ്യേണ്ടാത്ത മെയിലുകൾ അൺക്ലിക്ക് ചെയ്ത് ഒഴിവാക്കാനും സാധിക്കും. ജിമെയിലിന്റെ വെബ്‌വേർഷനിൽ നേരത്തെ തന്നെ 50 മെയിലുകൾ വരെ ഒരേ സമയം നീക്കം ചെയ്യാനുള്ള സൗകര്യം ലഭ്യമായിരുന്നു.
