അഹമ്മദാബാദ്: ഗുജറാത്ത് സന്ദർശനത്തിനിടെ അഹമ്മദാബാദിലെ സയൻസ് സിറ്റി സന്ദർശിച്ച് പ്രധാനമന്ത്രി നരേന്ദ്രമോദി. റോബോട്ടിക്സ് ഗാലറി, നേച്ചർ പാർക്ക്, അക്വാട്ടിക് ഗാലറി, ഷാർക്ക് ടണൽ എന്നിവിടങ്ങളിലാണ് പ്രധാനമന്ത്രി സന്ദർശനം നടത്തിയത്. സയൻസ് സിറ്റിയുടെ സന്ദർശനത്തിന് ശേഷം പ്രധാനമന്ത്രി ട്വിറ്ററിൽ ( എക്സ്) ചിത്രങ്ങൾ പങ്കുവെച്ചു. ഗുജറാത്ത് ഗവർണർ ശ്രീ ആചാര്യ ദേവവ്രത്, മുഖ്യമന്ത്രി ശ്രീ ഭൂപേന്ദ്ര പട്ടേൽ എന്നിവരോടൊപ്പമാണ് പ്രധാനമന്ത്രി സയൻസ് സിറ്റി സന്ദർശിച്ചത്.
‘ഗുജറാത്ത് സയൻസ് സിറ്റിയിൽ ഉജ്ജ്വലമായി പ്രദർശിപ്പിച്ചിരിക്കുന്ന റോബോട്ടിക്സ് ഗാലറിയിൽ നിന്നാണ് ഇന്നത്തെ ദിവസം തുടങ്ങിയതെന്നും ഈ സാങ്കേതിക വിദ്യകൾ യുവാക്കൾക്കിടയിൽ കൗതുകം ഉണർത്തുന്നത് എങ്ങനെയെന്ന് അറിഞ്ഞതിൽ സന്തോഷമുണ്ടെന്നും പ്രധാനമന്ത്രി ട്വിറ്ററിൽ കുറിച്ചു.
‘സയൻസ് സിറ്റിയിലെ ആകർഷകമായ പ്രദർശനത്തിലൂടെ ആരോഗ്യ സംരക്ഷണത്തിലും ദൈനംദിന ജീവിതത്തിലും റോബോട്ടുകളുടെ പ്രവർത്തന പങ്കാളിത്തം വ്യക്തമായി കാണാൻ സാധിച്ചു’ അദ്ദേഹം പറഞ്ഞു.
‘തിരക്കേറിയ ഗുജറാത്ത് സയൻസ് സിറ്റിയിലെ ശാന്തവും ആശ്വാസകരവുമായ ഇടമാണ് നേച്ചർ പാർക്ക്. പ്രകൃതി സ്‌നേഹികളും സസ്യശാസ്ത്രജ്ഞരും ഒരു പോലെ സന്ദർശിക്കേണ്ട ഇടമാണിവിടം. ജൈവവൈവിധ്യത്തെ പ്രോത്സാഹിപ്പിക്കുക മാത്രമല്ല, ഒരു വിദ്യാഭ്യാസ വേദിയായി പ്രവർത്തിക്കാനും പാർക്ക് സഹായിക്കുന്നു’ നേച്ചർ പാർക്ക് സന്ദർശിച്ച ശേഷം പ്രധാനമന്ത്രി ട്വിറ്ററിൽ കുറിച്ചു.
സയൻസ് സിറ്റിയിലെ അക്വാട്ടിക് ഗാലറി ജല വൈവിധ്യത്തിന്റെയും സമുദ്ര വിസ്മയങ്ങളുടെയും ആഘോഷമാണ്. ഇത് നമ്മുടെ ജല ആവാസവ്യവസ്ഥയെ സൂക്ഷ്മമായി വരച്ച് കാണിക്കുന്നു’ പ്രധാനമന്ത്രി പറഞ്ഞു.
