ദ്രുതഗതിയിൽ ശുചീകരണം നടത്തി അടുത്ത യാത്രയ്ക്ക് വന്ദേ ഭാരതിനെ സജ്ജമാക്കുന്ന ’14 മിനിറ്റ് മിറാക്കിൾ’ പദ്ധതി പ്രകാരം കാസർകോട് വന്ദേ ഭാരതും ശുചിയാക്കി. 20933 KGQ-TVC വന്ദേ ഭാരത് എക്സ്പ്രസിലാണ് പദ്ധതിയുടെ ഭാഗമായി വൃത്തിയാക്കിയത്. 16 കോച്ചുള്ള വന്ദേ ഭാരത് ട്രെയിനാണ് ഇന്നലെ ശുചിയാക്കിയത്. ഒരു കോച്ചിൽ മൂന്ന് പേരെ വീതമായിരുന്നു ശുചീകരണത്തിലേർപ്പെട്ടത്. 14 മിനിറ്റ് മുൻപ് തന്നെ അടുത്ത സർവീസിന് വന്ദേ ഭാരത് തയ്യാറായി.
മംഗലാപുരം കോച്ചിംഗ് ഡിപ്പോയിലെ ബി കോച്ചിംഗ് ഡിപ്പോ ഓഫീസറായ മനോജ്. ’14 മിനിറ്റ് മിറക്കിൾ’ പദ്ധതിയോടുള്ള പ്രതിജ്ഞാബദ്ധത പ്രതിജ്ഞ ചൊല്ലിക്കൊടുത്തു. പാലക്കാട് അഡീഷണൽ ഡിവിഷണൽ റെയിൽവേ മാനേജർ സക്കീർ ഹുസൈൻ പുതിയ പദ്ധതിയെ കുറിച്ചും ഇതുവഴി സൃഷ്ടിക്കുന്ന സമയലാഭത്തെ കുറിച്ചും ആവേശം പ്രകടിപ്പിച്ചു. അദ്ദേഹം ശുചീകരണ ജീവനക്കാരുമായി സംവദിക്കുകയും റെയിൽ യാത്ര കൂടുതൽ കൃത്യവും ആസ്വാദ്യകരവും ആക്കുന്നതിൽ ഈ പദ്ധതിയുടെ പ്രാധാന്യം വ്യക്തമാക്കുകയും ചെയ്തു.
സ്വച്ഛത ഹി സേവാ ക്യാമ്പെയ്നിന്റെ ഭാഗമായി ഇന്നലെ മുതാലാണ് ഇന്ത്യൻ റെയിൽവേ പുതിയ ശുചീകരണ യജ്ഞത്തിന് തുടക്കം കുറിച്ചത്. ജപ്പാനിലെ ബുള്ളറ്റ് ട്രെയിനുകൾ വൃത്തിയാക്കുന്ന 7 മിനിറ്റ് മിറാക്കിളിൽ നിന്ന് പ്രചോദനം ഉൾക്കൊണ്ടാണ് റെയിൽവേയുടെ പുതിയ സംരംഭം.
