അന്താരാഷ്‌ട്ര ക്രിക്കറ്റിൽ നിന്നും വിരമിച്ചെങ്കിലും ധോണിയുടെ വിശേഷങ്ങൾ ഇരുകൈയും നീട്ടിയാണ് ആരാധകർ സ്വീകരിക്കാറുള്ളത്. ക്യാപ്റ്റൻ കൂളിന്റെ ചിത്രങ്ങൾ വളരെ പെട്ടന്നാണ് സമൂഹ മാദ്ധ്യമങ്ങളിൽ വൈറലാവുന്നത്. അത്തരത്തിൽ സമൂഹ മാദ്ധ്യമങ്ങളിൽ തരംഗം സൃഷ്ടിക്കുകയാണ് പുതിയ ലുക്കിലുള്ള മഹേന്ദ്ര സിംഗ് ധോണിയുടെ ചിത്രങ്ങൾ.
പ്രശസ്ത ഹെയർ സ്റ്റൈലിഷറായ അലിം ഹക്കീം പങ്കുവച്ച ധോണിയുടെ പുതിയ ലുക്കിലുള്ള ചിത്രങ്ങളാണ് ഇപ്പോൾ ആരാധകരെ കിടിലം കൊള്ളിക്കുന്നത്. ഇൻസ്റ്റഗ്രാമിലാണ് ഹക്കീം ചിത്രങ്ങൾ പങ്കുവച്ചത്. കളർ ചെയ്ത മുടി പിൻ കഴുത്തിലേക്ക് നീട്ടിയ മാസ് ആറ്റിറ്റിയൂഡിൽ നിൽക്കുന്ന ധോണിയെയാണ് നമുക്ക് കാണാൻ സാധിക്കുക. ‘ ഞാൻ മഹിയുടെ നീളമുള്ള മുടിയുടെ കടുത്ത ആരാധകനാണ്. അങ്ങനെയാണ് ഞങ്ങൾ മുടിക്ക് പുതിയ ടെക്‌സ്ച്ചറും നിറവും നൽകാൻ തീരുമാനിച്ചത്. വളരെയധികം ആസ്വദിച്ചാണ് ഞാൻ മഹിയുടെ മുടി സ്റ്റൈൽ ചെയ്തത്’- ഹക്കീം ഇൻസ്റ്റഗ്രാമിൽ കുറിച്ചു.
പുതിയ ലുക്കിൽ എത്തിയ താരത്തിന്റെ ചിത്രങ്ങൾക്ക് നിമിഷനേരം കൊണ്ടാണ് 70k ലൈക്കുകളും നിരവധി കമന്റുകളും നേടാൻ സാധിച്ചത്. മുടി നീട്ടി വളർത്തിയ ഞങ്ങളുടെ പഴയ ധോണിയെ കാണാൻ സാധിച്ചെന്നായിരുന്നു ആരാധകരിൽ ചിലർ അഭിപ്രായപ്പെട്ടത്.
