ന്യൂഡൽഹി: രാജ്യത്തെ ചെറുകിട നഗര ഭവനങ്ങൾക്ക് സബ്സിഡിയോടെ വായ്പ നൽകുന്നതിന് 60,000 കോടി രൂപയുടെ വമ്പൻ പദ്ധതി പ്രഖ്യാപിച്ച് കേന്ദ്രസർക്കാർ. ബാങ്കുകൾ മുഖേനെ ഏതാനും മാസങ്ങൾക്കുള്ളിൽ പദ്ധതി നടപ്പാക്കാനാണ് കേന്ദ്രം ആസൂത്രണം ചെയ്തിരിക്കുന്നത്. സ്വാതന്ത്ര്യ ദിനത്തോടനുബന്ധിച്ച് ഓഗസ്റ്റിൽ നടത്തിയ പ്രസംഗത്തിൽ പ്രധാനമന്ത്രി നരേന്ദ്രമോദി പദ്ധതി പ്രഖ്യാപിച്ചിരുന്നുവെങ്കിലും ഇതിന്റെ വിശദാംശങ്ങൾ നേരത്തെ റിപ്പോർട്ട് ചെയ്തിരുന്നില്ല. നഗരങ്ങളിൽ താമസിക്കുന്നവരും എന്നാൽ വാടക വീടുകളിലോ ചേരികളിലോ അനധികൃത കോളനികളിലോ താമസിക്കുന്ന കുടുംബങ്ങൾക്ക് പ്രയോജനം ചെയ്യുന്ന പുതിയ പദ്ധതി വരും വർഷങ്ങളിൽ കേന്ദ്രം കൊണ്ടുവരുമെന്നാണ് പ്രസംഗത്തിൽ പ്രധാനമന്ത്രി പറഞ്ഞിരുന്നത്.
‘നഗരങ്ങളിലെ ദരിദ്രരെ പിന്തുണയ്‌ക്കുന്നതിനായി പലിശ സബ്സിഡികൾ നീട്ടുന്നതിൽ പ്രാഥമികമായി ശ്രദ്ധ കേന്ദ്രീകരിക്കുന്ന ഭവന മന്ത്രാലയത്തിന്റെ നിർദ്ദേശം കൂടുതൽ വിലയിരുത്തലിനായി കാബിനറ്റിന് കൈമാറി. ഉടൻതന്നെ കാബിനറ്റിന്റെ അനുമതി ലഭിക്കുമെന്ന് പ്രതീക്ഷിക്കുന്നു. അംഗീകാരം ലഭിച്ചുകഴിഞ്ഞാൽ, നഗരങ്ങളിലെ ദരിദ്രർക്കും ഇടത്തരം വരുമാനക്കാർക്കും ഗണ്യമായ ആനുകൂല്യങ്ങൾ വാഗ്ദാനം ചെയ്യുന്നതിനായി രൂപകൽപ്പന ചെയ്ത ഒരു പുതിയ ഭവനവായ്പ പദ്ധതിയുടെ ആരംഭത്തിന് ഇത് വഴിയൊരുക്കും’ -എന്ന് കേന്ദ്രധനമന്ത്രാലയം പറയുന്നു.
അടുത്ത അഞ്ച് വർഷത്തിനുള്ളിൽ ചെറുകിട നഗര ഭവനങ്ങൾക്ക് 9 ലക്ഷം രൂപ വരെയുള്ള വായ്പ തുകയ്‌ക്ക് 3 മുതൽ 6.5 ശതമാനം വരെ വാർഷിക പലിശ സബ്സിഡി നിരക്കിൽ നൽകുന്ന തരത്തിലായിരിക്കും പദ്ധതി. 20 വർഷത്തേക്ക് 50 ലക്ഷം രൂപയിൽ താഴെയുള്ള ഭവന വായ്പകൾക്ക് നിർദ്ദിഷ്ട പദ്ധതിക്ക് അർഹതയുണ്ടായേക്കും. ‘പലിശ ഇളവ് ഗുണഭോക്താക്കളുടെ ഭവനവായ്പ അക്കൗണ്ടിലേക്ക് മുൻകൂറായി ക്രെഡിറ്റ് ചെയ്യപ്പെടും. 2028 വരെ നിർദ്ദേശിച്ചിരിക്കുന്ന പദ്ധതി അന്തിമഘട്ടത്തിലേക്ക് അടുക്കുകയാണ് എന്ന് റിപ്പോർട്ടുകൾ വ്യക്തമാക്കുന്നു.
നഗരപ്രദേശങ്ങളിൽ സാമ്പത്തികമായി പിന്നാക്കം നിൽക്കുന്ന, താഴ്ന്ന വരുമാനക്കാരായ 2.5 ദശലക്ഷം അപേക്ഷകർക്ക് ഈ പദ്ധതി പ്രയോജനപ്പെടുത്താമെങ്കിലും സബ്സിഡിയുള്ള വായ്പയുടെ അളവ് അത്തരം വീടുകളുടെ ആവശ്യകതയെ ആശ്രയിച്ചിരിക്കുമെന്നും സർക്കാർ വ്യക്തമാക്കുന്നു. നഗര ഭവന ആവശ്യങ്ങൾക്കായി സ്ഥാപനപരമായ വായ്പയിലേക്കുള്ള പ്രവേശനം വർദ്ധിപ്പിക്കുന്നതിന്, ഡിമാൻഡ്-സൈഡ് സംരംഭമായി മിഷൻ ക്രെഡിറ്റ്-ലിങ്ക്ഡ് സബ്സിഡി ഘടകം ഉപയോഗിക്കും. വായ്പ നൽകുന്ന സ്ഥാപനങ്ങൾക്ക് ഈ സബ്സിഡി കാര്യക്ഷമമായി വിതരണം ചെയ്യുന്നതിനും അതിന്റെ നടത്തിപ്പിന് മേൽനോട്ടം വഹിക്കുന്നതിനും നാഷണൽ ഹൗസിംഗ് ബാങ്ക്, ഹൗസിംഗ് ആൻഡ് അർബൻ ഡെവലപ്മെന്റ് കോർപ്പറേഷൻ, സ്റ്റേറ്റ് ബാങ്ക് ഓഫ് ഇന്ത്യ എന്നിവയെ കേന്ദ്ര നോഡൽ ഏജൻസികളായി നിയമിച്ചിട്ടുണ്ട്. ഈ പദ്ധതിയ്‌ക്ക് കീഴിൽ, ഗുണഭോക്താക്കൾക്ക് ഒരു പ്രത്യേക ഘടകത്തിൽ നിന്ന് മാത്രമേ ആനുകൂല്യങ്ങൾ ലഭിക്കാൻ അർഹതയുള്ളൂ.
