ശ്രീനഗർ: ജമ്മുകശ്മീരിലെ കുൽഗാമിൽ രണ്ട് ഭീകരരെ വകവരുത്തി സുരക്ഷാ സേന. കുൽഗാമിൽ അതിർത്തി സുരക്ഷാ ഉദ്യോഗസ്ഥർ നടത്തിയ തിരച്ചിലിനിടെ ഭീകരരുമായി ഏറ്റുമുട്ടൽ ഉണ്ടാകുകയായിരുന്നു. പ്രദേശത്ത് തിരച്ചിൽ പുരോഗമിക്കുകയാണെന്ന് സുരക്ഷാ സേന ഉദ്യോഗസ്ഥർ അറിയിച്ചു.
സുരക്ഷാ സേനയ്‌ക്ക് ലഭിച്ച വിവരത്തെ തുടർന്നാണ് സംഘം പ്രദേശത്ത് പരിശോധന നടത്തിയത്. തുടർന്ന് സേനയും ഭീകരരും തമ്മിൽ ഏറ്റുമുട്ടുകയും രണ്ട് ഭീകരർ കൊല്ലപ്പെടുകയുമായിരുന്നു. പോലീസും സുരക്ഷാ സേനാ ഉദ്യോഗസ്ഥരും സംയുക്തമായി പ്രദേശത്ത് പരിശോധന നടത്തിവരികയാണ്.
കഴിഞ്ഞ ദിവസം രജൗരിയിൽ സൈന്യവും ഭീകരരും തമ്മിൽ ഏറ്റുമുട്ടൽ നടന്നിരുന്നു. കലാക്കോട്ടെ വനമേഖലയിൽ നടത്തിയ തിരച്ചിലിനിടെയാണ് ഏറ്റുമുട്ടൽ നടന്നത്. മേഖലയിൽ ഭീകരർ ഒളിച്ചിരിക്കുന്നതായി ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു സേന പരിശോധന നടത്തിയത്. ഏറ്റുമുട്ടലിൽ രണ്ട് സൈനികർക്ക് പരിക്കേറ്റിരുന്നു.
