ഉപയോക്താക്കൾക്ക് ഉപകാരപ്രദമാകും വിധത്തിൽ പുതിയ പ്രൈവസി ഫീച്ചർ അവതരിപ്പിക്കാനൊരുങ്ങി വാട്ട്‌സ്ആപ്പ്. ഉപയോക്താക്കൾക്ക് ഫോൺ നമ്പർ പങ്കിടാതെ തന്നെ മറ്റുള്ളവരുമായി ആശയവിനിമയം നടത്താൻ അനുവദിക്കുന്ന പുതിയ യൂസർ നെയിം ഫീച്ചറാണ് അവതരിപ്പിക്കാനൊരുങ്ങുന്നത്. ഇൻസ്റ്റഗ്രാമിന് സമാനമായ ഫീച്ചർ നിലവിൽ വരുന്നതോടെ ഉപഭോക്തൃ സ്വീകാര്യത വർദ്ധിക്കുമെന്നാണ് പ്രതീക്ഷ.
ഉപയോക്താക്കൾക്ക് അവരുടെ മൊബൈൽ നമ്പർ മറ്റുള്ളവരുമായി പങ്കുവെയ്‌ക്കേണ്ടി വരില്ല എന്നതാണ് ഇതിലൂടെ ലക്ഷ്യം വെയ്‌ക്കുന്നത്. ആൻഡ്രോയിഡ് ഡിവൈസിനുള്ളിലെ വാട്ട്‌സ്ആപ്പ് ബീറ്റാ പതിപ്പിൽ കുറച്ച് ദിവസങ്ങൾക്ക് മുമ്പ് വാബീറ്റ ഇൻഫോയാണ് ഇത്തരത്തിൽ വാട്ട്‌സ്ആപ്പ് നമ്പർ മറച്ച് ആശയവിനിമയം നടത്താനുള്ള സാദ്ധ്യത ആദ്യം കണ്ടെത്തിയത്. ഐഒഎസിലെ ബീറ്റാ ഉപയോക്താക്കളിൽ വാട്ട്‌സ്ആപ്പ് പുതിയ ഫീച്ചർ ഉടൻ തന്നെ എത്തിക്കും.
ഉപയോക്താവിന്റെ സ്വകാര്യത സംരക്ഷിക്കുന്നതിന്റെ ഭാഗമായി നിരവധി ഫീച്ചറുകളാണ് വാട്ട്‌സ്ആപ്പ് ഇതിനോടകം തന്നെ അവതരിപ്പിച്ചിരിക്കുന്നത്. കോൾ ചെയ്യുന്ന വേളകളിൽ ഐപി അഡ്രസ് സംരക്ഷിക്കുന്ന തരത്തിലുള്ള പുതിയ ഫീച്ചർ അവതരിപ്പിക്കുക എന്നതാണ് ലക്ഷ്യം. വോയ്‌സ്, വീഡിയോ കോൾ ചെയ്യുന്ന സമയത്ത് ഉപഭോക്താവിന്റെ ഐപി അഡ്രസ് വ്യക്തമാക്കാതെ സ്വകാര്യത ഉറപ്പു വരുത്തുക എന്നതാണ് ഇതിലൂടെ ലക്ഷ്യം വെയ്‌ക്കുന്നത്. പ്രവൈസി സെറ്റിംഗ്‌സിലാകും പുതിയ ഫീച്ചർ അവതരിപ്പിക്കുന്നത്.
