ഏഷ്യൻ ഗെയിംസിൽ സ്വർണ തിളക്കം നൽകിയ പുരുഷ ഹോക്കി ടീമിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. ആവേശകരമായ സ്വർണ്ണ മെഡൽ വിജയമാണ് പുരുഷ ഹോക്കി ടീമിന്റേത്. മികച്ച പ്രകടനം കാഴ്ച വെച്ച ഇന്ത്യൻ ടീമിന് അഭിനന്ദനങ്ങൾ. ടീമിന്റെ അചഞ്ചലമായ പ്രതിബദ്ധതയും അഭിനിവേശവും സമന്വയവും സ്വർണം മാത്രമല്ല നേടിയത്, ഈ വലിയ നേട്ടം എണ്ണമറ്റ ഇന്ത്യക്കാരുടെ ഹൃദയവും കവർന്നു. അവരുടെ ആത്മാവിന്റെ തെളിവാണ് ഈ വിജയം. മുന്നോട്ടുള്ള പ്രയത്‌നങ്ങൾക്ക് ആശംസകൾ എന്നാണ് പ്രധാനമന്ത്രി എക്‌സിൽ കുറിച്ചത്.
An exhilarating Gold Medal triumph by our Men’s Hockey Team at the Asian Games! Congratulations to the team for this outstanding performance. This team’s unwavering commitment, passion and synergy have not only won the game but also the hearts of countless Indians. This victory… pic.twitter.com/WFX6sbMzKc
— Narendra Modi (@narendramodi) October 6, 2023
22-ാം സ്വർണമാണ് പുരുഷ ഹോക്കി ടീമിലൂടെ ഇന്ത്യയ്‌ക്ക് ലഭിച്ചത്. ഫൈനലിൽ ജപ്പാനെ ഒന്നിനെതിരെ അഞ്ച് ഗോളുകളുകൾക്ക് തകർത്താണ് ഇന്ത്യ സ്വർണത്തിൽ മുത്തമിട്ടത്. ഏഷ്യൻ ഗെയിംസിലെ ഇന്ത്യയുടെ നാലാം പുരുഷ ഹോക്കി സ്വർണമാണ് ഇത്. മലയാളി താരം പി.ആർ ശ്രീജേഷാണ് ഇന്ത്യക്ക് വേണ്ടി ഗോൾവല കാത്തത്. നായകൻ ഹർമൻപ്രീത് സിംഗ് രണ്ട് ഗോളുകളും മൻപ്രീത് സിംഗ്, രോഹിദാസ്, അഭിഷേക് എന്നിവരും ഗോൾ നേടി. ഈ വിജയത്തോടെ ഇന്ത്യ പാരീസ് ഒളിമ്പിക്‌സിന് നേരിട്ട് യോഗ്യത നേടി.
ഇതുവരെ 95 മെഡലുകളാണ് ഇന്ത്യ നേടിയത്. മെഡലുറപ്പിച്ച മത്സരങ്ങൾ ഇനിയുമുണ്ട്. ചരിത്രത്തിലാദ്യമായി ഇന്ത്യ ഏഷ്യൻ ഗെയിംസിൽ മെഡൽവേട്ടയിൽ സെഞ്ച്വറി തികയ്‌ക്കും. പുരുഷ ഹോക്കിയിൽ ഇന്ത്യ സ്വർണം നേടിയതോടെ ആകെ മെഡൽ നേട്ടം 95-ൽ എത്തി. ഇനി അമ്പെയ്‌ത്തിലും കബഡിയിലും ക്രിക്കറ്റിലും ബാഡ്മിന്റണിലുമെല്ലാം ഇന്ത്യയ്‌ക്ക് ഉറച്ച മെഡലുകളുണ്ട്.
