ഹാഗ്‌ചോ: 2023 ഏഷ്യൻ ഗെയിംസിൽ ചരിത്രമെഴുതി ഇന്ത്യയുടെ ബാഡ്മിന്റൺ ഡബിൾസ് താരങ്ങളായ സാത്വിക് സായ്രാജ് രങ്കിറെഡ്ഡി-ചിരാഗ് ഷെട്ടി സഖ്യം. ഏഷ്യൻ ഗെയിംസ് പുരുഷ ബാഡ്മിന്റൺ ഡബിൾസ് വിഭാഗത്തിൽ ഫൈനലിൽ ഇടം നേടിയതോടെയാണ് ഇരുവരും ചരിത്രത്തിന്റെ ഭാഗമായത്.
ആദ്യമായാണ് പുരുഷ ഡബിൾസ് ബാഡ്മിന്റണിൽ ഇന്ത്യൻ താരങ്ങൾ ഫൈനലിലെത്തുന്നത്. ഫൈനലിൽ ദക്ഷിണകൊറിയയുടെ കിം വോൺ ഹോ-ചോയ് സോൾഗ്യു സഖ്യമാണ് ഇന്ത്യൻ സഖ്യത്തിന്റെ എതിരാളി. സെമിയിൽ മലേഷ്യയുടെ മുൻ ലോകചാമ്പ്യന്മാരായ ആരോൺ ചിയ-സോഹ് വൂയി യിക് സഖ്യത്തെ അട്ടിമറിച്ചാണ് ഇന്ത്യൻ ടീം ഫൈനലിലെത്തിയത്. നേരിട്ടുള്ള ഗെയിമുകൾക്കാണ് സാത്വിക്-ചിരാഗ് സഖ്യത്തിന്റെ വിജയം. വെറും 45 മിനിറ്റ് കൊണ്ട് മത്സരം അവസാനിപ്പിക്കുകയായിരുന്നു.
ബാഡ്മിന്റൺ ഡബിൾസ് ഇനത്തിൽ ഇന്ത്യ ചുരുങ്ങിയത് വെള്ളി മെഡലെങ്കിലും സ്വന്തമാക്കുമെന്ന് ഉറപ്പായി കഴിഞ്ഞു.ഏഷ്യൻ ഗെയിംസിൽ ബാഡ്മിന്റണിൽ ഇന്ത്യ ഇതുവരെ സ്വർണം നേടിയിട്ടില്ല, അതുകൊണ്ട് തന്നെ സ്വർണം നേടിയാൽ അതും ചരിത്രമാകും.പുരുഷ സിംഗിൾസിൽ മലയാളി താരം എച്ച് എസ് പ്രണോയ് വെങ്കലം നേടിയപ്പോൾ പുരുഷ ടീം വെള്ളി നേടിയിരുന്നു.
