മുംബൈ: 2036ലെ ഒളിമ്പിക്സിന് ആതിഥേയത്വം വഹിക്കാൻ ഇന്ത്യ തയ്യാറാണെന്ന് പ്രധാനമന്ത്രി നരേന്ദ്ര മോദി. അന്താരാഷ്ട്ര ഒളിമ്പിക്സ്് കമ്മിറ്റി സെഷനിലാണ് പ്രധാനമന്ത്രി ഇക്കാര്യം വ്യക്തമാക്കിയത്. രാജ്യത്തെ 140 കോടി ജനങ്ങൾ ഒളിമ്പിക്സിന് ഭാരതം വേദിയാകാൻ ആഗ്രഹിക്കുന്നു. കായിക മാമാങ്കത്തിന് വേദിയാകാൻ സാധിച്ചാൽ അത് ഇന്ത്യയെ സംബന്ധിച്ച് അഭിമാനാർഹമായ നേട്ടമാണ്. ഒളിമ്പിക്സ് കമ്മിറ്റിയുടെ പിന്തുണ ഇതിനുണ്ടാകുമെന്ന് കരുതുന്നതായും പ്രധാനമന്ത്രി മോദി വേദിയിൽ പറഞ്ഞു.
അന്താരാഷ്ട്ര ഒളിമ്പിക്സ് കമ്മറ്റിയുടെ 141-ാം സെഷനാണ് ഇന്നലെ മുംബൈയിൽ തുടക്കമായാത്. 40 വർഷത്തിന്റെ ഇടവേളയ്ക്ക് ശേഷമാണ് ഇന്ത്യ ഐഒസി സെഷന് ആതിഥേയത്വം വഹിക്കുന്നത്. ഐഒസി പ്രതിനിധി തോമസ് ബാച്ച് ഇന്ത്യയുടെ ഏഷ്യൻ ഗെയിംസ് പ്രകടനത്തെ അഭിനന്ദിച്ചു. ഇന്ത്യയുടെ കായികരംഗത്തുളള മുന്നേറ്റത്തിൽ ഒളിമ്പിക്സ് സമൂഹം സന്തോഷിക്കുന്നതായും അദ്ദേഹം പറഞ്ഞു.
