ചൂട് പറക്കുന്ന ചായയും കൂടെ കഴിക്കാൻ ഉരുളക്കിഴങ്ങ് ചിപ്സും ഉണ്ടെങ്കിൽ പിന്നെ ചുറ്റുമുള്ളതൊന്നും നോക്കാതെ ആസ്വദിച്ച് കഴിക്കുന്നവരാണ് നമ്മിൽ പലരും. കുട്ടികളെന്നോ മുതിർന്നവരെന്നോ പ്രായ വ്യത്യാസമില്ലാതെ എല്ലാവരും ഇപ്പോൾ പാക്കറ്റുകളിൽ പല രുചികളിൽ കിട്ടുന്ന ഉരുളക്കിഴങ്ങ് ചിപ്സ് ഇഷ്ടപ്പെടുന്നവരാണ്. അതുപോല തന്നെയാണ് ഐസ്‌ക്രീമുകളും. പല ഫ്ളേവറുകൾ അടങ്ങിയിട്ടുള്ള ഐസ്‌ക്രീമുകളും ആസ്വദിച്ച് കഴിക്കാൻ നമുക്ക് ഇഷ്ടമാണ്. കഴിച്ച് തുടങ്ങിയാൽ പിന്നെ നിർത്താൻ തോന്നാത്ത എന്തോ ഒരു മാജിക് ഈ ഭക്ഷണ പദാർത്ഥങ്ങളിൽ ഉണ്ടെന്ന് പലരും ചിന്തിച്ചിരിക്കും. അതിനുള്ള ഉത്തരമാണ് ഇപ്പോൾ പുതിയ പഠനങ്ങളിൽ പുറത്ത് വന്നിരിക്കുന്നത്.
ലഹരികളിൽ അടിമപ്പെടുന്നവർ എന്തുകൊണ്ട് അത് നിർത്താൻ തയ്യാറാകുന്നില്ല? അത് പോലെ ഈ ഭക്ഷണ പദാർത്ഥങ്ങളിലും കൊക്കെയ്ൻ പോലുള്ള ലഹരി പദാർത്ഥങ്ങൾക്ക് സമാനമായ അഡിക്ഷനുണ്ടാക്കുമെന്നാണ് പഠനങ്ങളിൽ പറയുന്നത്. പത്ത് പേരെ എടുത്താൽ അതിൽ ഒരാൾക്കെങ്കിലും ഈ പദാർത്ഥങ്ങളിൽ ആസക്തി ഉണ്ടാകുമെന്നാണ് വിദഗ്ധർ പറയുന്നത്. അൾട്രാ പ്രൊസസ്ഡ് ഫുഡ് അഥവാ സംസ്‌കരിച്ച ഭക്ഷ്യവസ്തുക്കൾ എന്ന വിഭാഗത്തിൽപ്പെടുന്ന ഇവ നിക്കോട്ടിൻ, കൊക്കെയ്ൻ, ഹെറോയിൻ എന്നിവയ്‌ക്ക് സമാനമായ അഡിക്ഷൻ വ്യക്തികളിൽ ഉണ്ടാക്കുന്നു. ബ്രിട്ടീഷ് മെഡിക്കൽ ജേർണലിലാണ് ഇതുസംബന്ധിച്ച പഠനം ഉൾപ്പെടുത്തിയിരിക്കുന്നത്.
അൾട്രാ പ്രോസസ്ഡ് ഭക്ഷണങ്ങളിൽ കാർബോഹൈഡ്രേറ്റും കൊഴുപ്പും കൂടുതലായിരിക്കുമെന്നും പഠനങ്ങളിൽ കണ്ടെത്തി. ഇതുമൂലമാണ് മനുഷ്യരിൽ ഇത്തരം ഭക്ഷണങ്ങൾ കഴിക്കാനുള്ള ആസക്തി വർദ്ധിക്കുന്നതെന്നാണ് ഗവേഷകർ പറയുന്നത്. ഈ ഭക്ഷണം കഴിക്കുമ്പോൾ ശരീരത്തിൽ ഡോപമൈൻ ഹോർമോണുകൾ അമിതമായി ഉത്പദിപ്പിക്കപ്പെടുകയും പിന്നീട് കുറയുകയും ചെയ്യുന്നു. ഈ ഹോർമോണുകളുടെ ഉത്പാദനം കുറയുമ്പോഴാണ് വീണ്ടും വീണ്ടും ഇത്തരം ഭക്ഷണങ്ങൾ കഴിക്കാനുള്ള ആസക്തി വർദ്ധിക്കുന്നതെന്നാണ് പുറത്തു വരുന്ന റിപ്പോർട്ടുകൾ സൂചിപ്പിക്കുന്നത്. ഉരുളക്കിഴങ്ങ് ചിപ്സും , ഐസ്‌ക്രീമും മാത്രമല്ല പാക്കറ്റ് ഫുഡുകളായ എല്ലാവിധ ഭക്ഷണങ്ങളിലും എനർജി ഡ്രിംഗ്സിലും ഇത്തരം ഘടകങ്ങൾ അടങ്ങിയിട്ടുണ്ട്. ഇത് പൊണ്ണത്തടി, പ്രമേഹം, തുടങ്ങി ഒട്ടനവധി ആരോഗ്യ പ്രശ്നങ്ങൾക്ക് വഴിവെയ്‌ക്കുമെന്നും പഠനങ്ങൾ ചൂണ്ടിക്കാട്ടുന്നു.
