ലക്‌നൗ: ഡൽഹി-ഗാസിയാബാദ്-മീററ്റ് ആർആർടിഎസ് കോറിഡോർ പ്രധാനമന്ത്രി നരേന്ദ്രമോദി ഫ്ലാഗ് ഓഫ് ചെയ്തു. രാജ്യത്തെ ആദ്യത്തെ സെമി ഹൈസ്പീഡ് റീജിയണൽ ട്രെയിൻ സർവ്വീസാണിത്. ഇത് രാജ്യത്തിനാകെ ചരിത്ര നിമിഷമാണെന്നാണ് ഉദ്ഘാടനത്തിന് ശേഷം അദ്ദേഹം വിശേഷിപ്പിച്ചത്. ഡല്‍ഹി-ഗാസിയാബാദ്-മീററ്റ് റീജിയണല്‍ റാപ്പിഡ് ട്രെയിന്‍ ട്രാന്‍സിറ്റ് സിസ്റ്റം (ആര്‍ആര്‍ടിഎസ്) ഇടനാഴിയുടെ 17 കിലോമീറ്റര്‍ ഭാഗത്തിന്റെ ഉദ്ഘാടനത്തിന് ശേഷം പൊതുജനങ്ങളോട് സംസാരിക്കുകയായിരുന്നു പ്രധാനമന്ത്രി.
“ഇത് രാജ്യത്തിനാകെ ഒരു ചരിത്ര നിമിഷമാണ്. ഇന്ന് ആർആർടിഎസ് ഇടനാഴിയുടെ പ്രവർത്തനം ആരംഭിച്ചു. ഇന്ത്യയിലെ ആദ്യത്തെ റീജിയണൽ റാപ്പിഡ് ട്രെയിൻ സർവീസ് കൂടിയായ നമോ ഭാരത് ട്രെയിൻ രാജ്യത്തിന് സമർപ്പിക്കുന്നു. നാല് വർഷം മുമ്പ് ഡൽഹി-ഗാസിയാബാദ്-മീററ്റ് റീജിയണൽ കോറിഡോർ പദ്ധതിയുടെ തറക്കല്ലിടൽ നടത്തിയിരുന്നു. ഇന്ന് ഉത്തർപ്രദേശിലെ സാഹിയബാദ്, മുതൽ ദുഹായ് സ്റ്റേഷൻ വരെയുള്ള പാതയിൽ നമോ ഭാരതിന്റെ സർവീസ് ആരംഭിച്ചു. നേരത്തെ ഒരു കാര്യം പറഞ്ഞിരുന്നു, ഇന്നും അതുതന്നെ പറയുന്നു. “ജിസ്‌ക ശീലന്യാസ് ഹം കർതേ ഹേ, ഉസ്‌ക ഉദ്ഘാടൻ ഭീ ഹം ഹീ കർത്തേ ഹേ” (ഞങ്ങൾ തറക്കല്ലിട്ടതിന്റെ ഉദ്ഘാടനം ഞങ്ങൾ തന്നെ നിർവഹിക്കും)” അദ്ദേഹം കൂട്ടിച്ചേർത്തു. ”
നമോ ഭാരത് ട്രെയിൻ രാജ്യത്തെ സ്ത്രീ ശാക്തീകരണത്തിന്റെ പ്രതീകമാണ്. നമോ ഭാരതിലെ ഡ്രൈവർ മുതൽ എല്ലാ മുഴുവൻ ജീവനക്കാരും സ്ത്രീകളാണ്. ഇത് ഇന്ത്യയിൽ വളർന്ന് വരുന്ന സ്ത്രീ ശാക്തീകരണത്തിന്റെ പ്രതീകമാണെന്നും അദ്ദേഹം പറഞ്ഞു. തുടർന്ന് ട്രെയിൻ യാത്രയുടെ ബാല്യകാല ഓർമ്മകളും പ്രധാനമന്ത്രി അനുസ്മരിച്ചു.
“ഈ അത്യാധുനിക സൗകര്യങ്ങളോടെയുള്ള നമോ ഭാരതിലെ യാത്ര ആസ്വാദിക്കാൻ എനിക്ക് അവസരം ലഭിച്ചു. എന്റെ ബാല്യകാലം റെയിൽവേ പ്ലാറ്റ്‌ഫോമിൽ ചെലവഴിച്ചിട്ടുണ്ട്. എന്നാൽ ഇന്ന് റെയിൽവേയുടെ ഈ പുതിയമാറ്റം എന്നിൽ സന്തോഷം നിറയ്‌ക്കുകയാണ്.ഈ അനുഭവം രസകരമാണ്. നവരാത്രി കാലത്ത് മംഗള കർമ്മങ്ങൾ ചെയ്യുന്ന പാരമ്പര്യം നമുക്കുണ്ട്. ഇന്ത്യയിലെ ആദ്യത്തെ നമോ ഭാരത് ട്രെയിനിന് ഇന്ന് മാ കാർത്യായനിയുടെ അനുഗ്രഹം ലഭിച്ചു.”പ്രധാനമന്ത്രി മോദി കൂട്ടിച്ചേർത്തു.
അതേസമയം ഇത് ഞങ്ങൾക്ക് ലഭിച്ച നവരാത്രിസമ്മാനമാണെന്നാണ് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞത്. കഴിഞ്ഞ ഒമ്പതര വർഷത്തിനിടയിൽ അങ്ങയുടെ നേതൃത്വത്തിൽ ലോകോത്തര അടിസ്ഥാന സൗകര്യങ്ങൾ ഞങ്ങൾ കണ്ടു. വിമാനത്താവളത്തിന്റെ മാതൃകയിൽ റെയിൽവേ സ്റ്റേഷനുകൾ വികസിപ്പിക്കുന്നു, വന്ദേഭാരത് പുതിയ ഇന്ത്യയുടെ പ്രതീകമാണ്. ഇപ്പോഴിതാ റീജിയണൽ റാപ്പിഡ് ട്രെയിൻ സർവീസ് (ആർആർടിഎസ്) ആരംഭിക്കുന്നതിന്റെ ഭാഗമായി ആദ്യഘട്ടത്തിൽ ഉത്തർപ്രദേശിലെ സാഹിയബാദ്, ദുഹായ് സ്റ്റേഷനുകളെ ബന്ധിപ്പിക്കുന്ന റാപ്പിഡ് എക്‌സ് ട്രെയിൻ പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തു. ” മുഖ്യമന്ത്രി യോഗി ആദിത്യനാഥ് പറഞ്ഞു.
