ന്യൂഡൽഹി: പ്രതിരോധ മന്ത്രി രാജ്നാഥ് സിംഗിനും നിരവധി ഇന്ത്യൻ വ്യോമസേനാ ഉദ്യോഗസ്ഥർക്കും വേണ്ടി കങ്കണ റണാവത്തിന്റെ ഏറ്റവും പുതിയ ചിത്രമായ തേജസിന്റെ പ്രത്യേക പ്രദർശനം ഇന്ന് നടക്കും. ഡൽഹിയിൽ വച്ചാണ് ചിത്രത്തിന്റെ പ്രദർശനം നടത്തുന്നത്. കങ്കണ തന്നെയാണ് ഇക്കാര്യം അറിയിച്ചത്.
പ്രതിരോധ മന്ത്രിക്കും ഇന്ത്യൻ വ്യോമസേനയിലെ നിരവധി ഉദ്യോഗസ്ഥർക്കും വേണ്ടി ഞങ്ങളുടെ തേജസ് എന്ന സിനിമയുടെ പ്രത്യേക പ്രദർശനം ഇന്ന് സംഘടിപ്പിച്ചിട്ടുണ്ട്. എല്ലാവരുടെയും പ്രാർത്ഥനയും അനുഗ്രഹവും വേണം എന്ന് കങ്കണ റണാവത്ത് പറഞ്ഞു.
സർവേശ് മേവാര സംവിധാനം ചെയ്യുന്ന തേജസ് ഒക്ടോബർ 27ന് പ്രദർശനത്തിനെത്തും. വ്യോമസേന പൈലറ്റ് ആയ തേജസ് ഗില്ലിന്റെ യാത്രയെ ചുറ്റിപറ്റിയുള്ളതാണ് ചിത്രത്തിന്റെ ഇതിവൃത്തം. നിരവധി വെല്ലുവിളികളെ അതിജീവിച്ച് ഇന്ത്യൻ വ്യോമസേന എങ്ങനെ നമ്മുടെ രാജ്യത്തെ കാത്ത് സംരക്ഷിക്കുവാൻ ആശ്രാന്തമായി പരിശ്രമിക്കുന്നുവെന്നാണ് ചിത്രത്തിലൂടെ പറയുന്നത്.
