ന്യൂഡൽഹി: പ്രശസ്ത ക്രിക്കറ്റ് താരം ബിഷൻ സിംഗ് ബേദിയുടെ വിയോഗത്തിൽ അനുശോചനമറിയിച്ച് പ്രധാനമന്ത്രിയും രാഷ്ട്രപതിയും. സമൂഹമാദ്ധ്യമമായ എക്‌സിലൂടെയാണ് ഇരുവരും അനുശോചനം രേഖപ്പെടുത്തിയത്. ‘ബിഷൻ സിംഗ് ബേദി ജിയുടെ വേർപാടിൽ അഗാധമായ ദുഃഖം രേഖപ്പെടുത്തുന്നു. സ്‌പോർട്‌സിനോടുള്ള അദ്ദേഹത്തിന്റെ അഭിനിവേശം, ഇന്ത്യയ്‌ക്ക് നിരവധി മികച്ച പ്രകടനങ്ങളും അവിസ്മരണീയമായ മുഹൂർത്തങ്ങളും സമ്മാനിച്ചു. ഭാവി തലമുറയിലെ ക്രിക്കറ്റ് താരങ്ങൾക്ക് അദ്ദേഹം വലിയ പ്രചോദനം കൂടിയാണ്. അദ്ദേഹത്തിന്റെ കുടുംബാംഗങ്ങളോടും ആരാധകരോടും അനുശോചനം അറിയിക്കുന്നു. ഓം ശാന്തി. എന്നായിരുന്നു പ്രധാനമന്ത്രി എക്‌സിൽ കുറിച്ചത്.
ബിഷൻ സിംഗ് ബേദിയുടെ വിയോഗത്തോടെ ഭാരതത്തിന് നഷ്ടമായത് ഏറ്റവും മികച്ച കായിക പ്രതിഭകളിൽ ഒരാളെയാണ്. സ്പിൻ ബൗളിംഗ് ഒരു കലയാക്കി ഉയർത്തിയ ചുരുക്കം ചിലരിൽ ബിഷൻ സിംഗ് ബേദിയും ഉൾപ്പെടുന്നു. ക്രിക്കറ്റിന്റെയും ക്രിക്കറ്റ് താരങ്ങളുടെയും വളർച്ചയിലും അദ്ദേഹം നിർണായക പങ്കുവഹിച്ചു. അദ്ദേഹത്തിന്റെ കുടുംബാംഗങ്ങളോടും ക്രിക്കറ്റ് ആരാധകരോടും ഞാൻ എന്റെ അനുശോചനം അറിയിക്കുന്നു. എന്നായിരുന്നു രാഷ്‌ട്രപതി ദ്രൗപദി മുർമു എക്‌സിൽ കുറിച്ചത്.
