മെക്‌സിക്കോ സിറ്റി: മെക്സിക്കോയിൽ രണ്ടിടത്തായി നടന്ന ആക്രമണത്തിൽ 11 പോലീസുകാർ ഉൾപ്പടെ 16 പേർ കൊല്ലപ്പെട്ടു. ലഹരിമാഫിയയുമായുള്ള ഏറ്റുമുട്ടലിലാണ് 11 പോലീസുകാർ കൊല്ലപ്പെട്ടത്. ദക്ഷിണ മെക്‌സിക്കോയിലെ കോയുകാ ദെ ബെനിറ്റെസ് മുനിസിപ്പാലിറ്റിയിലാണ് സംഭവം. പട്രോൾ സംഘത്തിന് നേരെ അജ്ഞാത അക്രമി സംഘം നിറയൊഴിക്കുകയായിരുന്നു. മുനിസിപ്പൽ പോലീസിലെ 11 പേരാണ് ആക്രമണത്തിൽ കൊല്ലപ്പെട്ടത്. സംഘർഷ ബാധിത മേഖല പൂർണ്ണമായും ലഹരിക്കടത്ത് സംഘത്തിന്റെ നിയന്ത്രണത്തിലുള്ളതാണെന്നാണ് വിവരം.
രണ്ടാമത്തെ ആക്രമണം നടന്നത് മെക്‌സിക്കോയിലെ പടിഞ്ഞാറൻ സംസ്ഥാനമായ മിക്കോകനിലാണ്. ഇവിടെ സാധാരണക്കാർക്ക് നേരെ അജ്ഞാതർ വെടിയുതിർക്കുകയായിരുന്നു. അഞ്ച് പേർ കൊല്ലപ്പെടുകയും രണ്ട് പേർക്ക് പരിക്കേൽക്കുകയും ചെയ്തു. രാജ്യത്ത് 2006 മുതലാണ് ലഹരിമാഫിയക്കെതിരെ ഭരണകൂടം നടപടികൾ കടുപ്പിക്കുന്നത്. തുടർന്നുണ്ടായ ഏറ്റുമുട്ടലുകളിൽ 4,20,000 ആളുകൾ കൊല്ലപ്പെട്ടതായാണ് കണക്ക്.
