കാസർകോട്: ഭക്തിയുടെ നിറവിൽ കൊല്ലൂർ മൂകാംബിക ക്ഷേത്രം. വിജയദശമി ദിനത്തിൽ കൊല്ലൂർ മൂകാംബിക ക്ഷേത്രത്തിൽ ആയിരകണക്കിന് കുരുന്നുകൾ ഹരിശ്രീ കുറിച്ചു. പുലർച്ചെ മൂന്ന് മണിക്കാണ് ക്ഷേത്ര നട തുറന്നത്. നട തുറന്നത് മുതൽ വൻ ഭക്തജനത്തിരക്കാണ് ക്ഷേത്രത്തിൽ അനുഭവപ്പെട്ടത്.
നിർമ്മാല്യ ദർശനത്തിന് പിന്നാലെ നാല് മണി മുതൽ വിദ്യാരംഭ ചടങ്ങുകൾ ആരംഭിച്ചു. സരസ്വതി മണ്ഡപത്തിന് സമീപം ചണ്ഡികാ ഹോമം നടക്കുന്ന ഹാളിലാണ് ചടങ്ങ് നടന്നത്. ഒരേ സമയം 20 ആചാര്യൻമാർ എഴുത്തിനിരുത്തൽ ചടങ്ങിന് നേതൃത്വം നൽകി. പുലർച്ചെ ആരംഭിച്ച വിദ്യാരംഭ ചടങ്ങുകൾ ഉച്ചയോടെ സമാപിച്ചു.
ക്ഷേത്രം തന്ത്രി നിത്യാനന്ദ അഡിഗയുടെ നേതൃത്വത്തിൽ വിശേഷാൽ പൂജകളും നടന്നു. ഭക്തരുടെ നീണ്ട നിരയാണ് ക്ഷേത്രത്തിലുണ്ടായിരുന്നത്. ഉഡുപ്പിയിൽ നിന്നെത്തിയ പുലികളി സംഘം കൊല്ലൂരിൽ നൃത്താർച്ചന നടത്തി. നിരവധി കലാകാരൻമാരും ദേവിയ്ക്ക് മുന്നിൽ കലാർച്ചന നടത്തി. വിജയദശമിയോട് അനുബന്ധിച്ച് വിപുലമായ ക്രമീകരണങ്ങളാണ് പോലീസും ക്ഷേത്ര അധികൃതരും ഒരുക്കിയത്.
