മോട്ടോർ വാഹന വകുപ്പ് തയ്യാറാക്കിയ റോഡ് സുരക്ഷാ പുസ്തകം ഹയർസെക്കൻഡറി പാഠ്യപദ്ധതിയിലേക്ക് ഉൾപ്പെടുത്താൻ ഒരുങ്ങുന്നു. ഇതിൽ പാസാകുന്നവർക്ക് ലേണേഴ്സ് ഡ്രൈവിംഗ് ലൈസൻസിന് പ്രത്യേക പരീക്ഷ എഴുതേണ്ടതില്ല. പാഠ്യപദ്ധതിയിൽ ഉൾപ്പെടുത്തുന്നതോടെ ടെസ്റ്റിന് വേണ്ടി നേരിട്ട് അപേക്ഷിക്കാനകും. ഹയർസെക്കൻഡറി പാഠ്യപദ്ധതി പരിഷ്കരണകമ്മിറ്റി ഇവയുൾപ്പെടുത്തി പാഠഭാഗങ്ങൾ പരിഷ്കരിക്കുന്നതിന് വേണ്ടിയുള്ള നടപടികൾ ആരംഭിച്ചു.
റോഡ് സുരക്ഷാ വിദഗ്ധരും മോട്ടോർവാഹന വകുപ്പ് ഉദ്യോഗസ്ഥരും ഉൾപ്പെട്ട സമിതിയാണ് വിദ്യാർത്ഥികൾക്ക് വേണ്ടി റോഡ് സുരക്ഷാ പുസ്തകം സജ്ജമാക്കുന്നത്. ഹയർസെക്കൻഡറി സിലബസിന് യോജിക്കുന്ന വിധത്തിലുള്ള പാഠ്യഭാഗങ്ങൾ സ്വീകരിക്കാനാണ് തീരുമാനം. എന്നാൽ ഏത് വിഷയത്തിന്റെ ഭാഗമാക്കണമെന്നത് സംബന്ധിച്ച കാര്യത്തിൽ തീരുമാനമായിട്ടില്ല. പാഠ്യപദ്ധതി പരിഷ്കരണത്തോടെ സംസ്ഥാനത്തെ ലേണേഴ്സ് പരീക്ഷാ സംവിധാനത്തിൽ മാറ്റം വരുത്തണമെന്ന ആവശ്യം ഉന്നയിച്ച് സംസ്ഥാന സർക്കാർ കേന്ദ്ര സർക്കാരിന് കത്ത് നൽകിയിട്ടുണ്ട്.
ഡ്രൈവിംഗ് ടെസ്റ്റ് പരിഷ്കരിക്കുന്നതിന് വേണ്ടി കേന്ദ്രസർക്കാരും തീരുമാനമെടുത്തിട്ടുണ്ട്. പുതിയതായി ആരംഭിക്കുന്ന അക്രെഡിറ്റഡ് ഡ്രൈവർ ട്രെയിനിംഗ് ഇൻസ്റ്റിറ്റ്യൂട്ടുകളിൽ പഠിക്കുന്നവർക്ക് നിലവിലുള്ള ലേണേഴ്സ് പരീക്ഷ ഒഴിവാക്കാനാണ് കേന്ദ്രത്തിന്റെ തീരുമാനം. കേന്ദ്രത്തിന്റെ പരിഗണനയിലുള്ള ഡ്രൈവർ പരിശീലന കേന്ദ്രങ്ങളിലെ പാഠ്യപദ്ധതി മാതൃകയാക്കിയാണ് എംവിഡി സുരക്ഷാ പുസ്തകം സജ്ജമാക്കുന്നത്.