വാഷിംഗ്ടൺ: യു എസ് ആസ്ഥാനമായി പ്രവർത്തിക്കുന്ന യുണൈറ്റഡ് എയർലൈൻസിലെ എയർഹോസ്റ്റസുമാർ കോടതിയിൽ. വിമാനക്കമ്പനി അടുത്തിടെ ജീവനക്കാരെ തിരഞ്ഞെടുത്തപ്പോൾ സ്വീകരിച്ച മാനദണ്ഡം ശരിയായില്ലെന്ന് കാണിച്ചാണ് കോടതിയിൽ കേസ് ഫയൽ ചെയ്തത്. ഡോൺ ടോഡ് (50), ഡാർബി ക്വസാദ (44) എന്നിവരാണ് കോടതിയെ സമീപിച്ചത്.
യുണൈറ്റഡ് എയർലൈൻസിൽ ബേസ്ബോൾ ടീമിനായുള്ള ചാർട്ടേഡ് വിമാനത്തിലേക്ക് എയർഹോസ്റ്റസുമാരെ തിരഞ്ഞെടുത്തപ്പോൾ ചില കാരണങ്ങൾ കാണിച്ച് തങ്ങളെ ഒഴിവാക്കിയെന്ന് പരാതിയിൽ പറയുന്നു.’നീലക്കണ്ണുള്ള വെളുത്ത് മെലിഞ്ഞ ചെറുപ്പക്കാരി’കളായ എയർഹോസ്റ്റസുമാരെയാണ് തങ്ങൾക്ക് ആവശ്യമെന്ന് കമ്പനി ഇവരോട് പറഞ്ഞു. ഇത് തങ്ങളെ മാനസികമായി തളർത്തുന്ന തരത്തിലുള്ള തീരുമാനമായിരുന്നെന്നും ഇരുവരും പരാതിയിൽ പറഞ്ഞു.
തങ്ങൾ ജോലിയിൽ മതിയായ പ്രാവീണ്യവും യോഗ്യതയും ഉള്ളവരാണ്. തങ്ങൾ വെള്ളക്കാരല്ല എന്നതാണ് എയർലൈൻസ് കുറവായി ചൂണ്ടിക്കാട്ടുന്നതെന്ന് ഡോൺ ടോഡും ഡാർബി ക്വസാദയും പറഞ്ഞു. തങ്ങൾ 15 വർഷമായി യുൈണറ്റഡ് എയർലൈൻസിൽ ജോലി ചെയ്യുന്നവരാണെന്നും പരാതിയിൽ ചൂണ്ടിക്കാട്ടി.