ലോകത്തിന്റെ ഏത് കോണിൽ പോയാൽ നമ്മുടെ ഐഡിന്റിറ്റി വെളിപ്പെടുത്താൻ ഉപയോഗിക്കാവുന്ന ഒരു ഏകീകൃത തിരിച്ചറിയിൽ രേഖയാണ് ആധാർ കാർഡുകൾ. രാജ്യത്തെ മുഴുവൻ പൗരന്മാർക്കുമായി ഏകീകൃത തിരിച്ചറിയൽ സംവിധാനം കൊണ്ടുവരുകയെന്ന ലക്ഷ്യത്തോടെ കേന്ദ്ര സർക്കാർ തുടക്കമിട്ട പദ്ധതിയാണിത്. ഓരോ വ്യക്തിയുടെയും വിരലടയാളങ്ങൾ, ഐറിസ് സ്‌കാനുകൾ, ഫോട്ടോഗ്രാഫുകൾ എന്നിവ ഉൾപ്പെടുത്തികൊണ്ടാണ് ആധാർ തയാറാക്കുന്നത്.
മറ്റ് വ്യക്തിഗത വിവരങ്ങളോടൊപ്പം മൊബൈൽ നമ്പറും ആധാറിൽ ഉൾപ്പെടുത്തുന്നുണ്ട്. സുരക്ഷാ ഉറപ്പാക്കുന്നതിനും വ്യക്തിഗത വിവരങ്ങൾ സംരക്ഷിക്കുന്നതിന്റെയും ഭാഗമായാണ് ഇത്തരത്തിൽ ആധാറിൽ മൊബൈൽ നമ്പർ ചേർക്കുന്നത്. പ്രവാസികളുടെ ഒരു പ്രധാന സംശയമാണ് വിദേശ നമ്പർ ആധാറിൽ ഉൾപ്പെടുത്താൻ സാധിക്കുമോ എന്നുള്ളത്. എന്നാൽ യുഐഡിഎഐ (യൂണിക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ) ആധാറിൽ വിദേശ മൊബൈൽ നമ്പർ നൽകാൻ അനുവദിക്കില്ല.
ആധാർ രജിസ്‌ട്രേഷൻ ചെയ്യുന്നതുൾപ്പെടെയുള്ള മറ്റ് അനുബന്ധ നടപടികൾക്ക് ഇന്ത്യൻ മൊബൈൽ നമ്പറുകൾ മാത്രമേ ഉപയോഗിക്കാൻ നിർവാഹമുള്ളൂ. ഏത് പ്രായക്കാർക്കും ആധാറിനായി അപേക്ഷിക്കാവുന്നതാണ്. പ്രവാസികൾക്ക് ഇന്ത്യയിലെ ഏതെങ്കിലും ആധാർ കേന്ദ്രത്തിൽ പാസ്പോർട്ട് ഉൾപ്പെടെ ആവശ്യമായ മറ്റെല്ലാ രേഖകളും സമർപ്പിച്ച് കൊണ്ട് ആധാറിനായി അപേക്ഷിക്കാം. ആവശ്യമായ രേഖകൾ നൽകിക്കൊണ്ട് ആധാറിലെ മൊബൈൽ നമ്പർ പുതുക്കുന്നതിനും സാധിക്കും.
