സ്ത്രീ ശാക്തീകരണവും സാമ്പത്തിക ഭദ്രതയും ഉറപ്പാക്കുന്ന എൽഐസിയുടെ മികച്ച പദ്ധതിയാണ് ‘എൽഐസി ആധാർ ശില പ്ലാൻ’. സ്ത്രീകൾക്ക് വേണ്ടി മാത്രമുള്ള പ്ലാനാണ് ഇത്. ആധാർ കാർഡുള്ളവർക്ക് പദ്ധതിയുടെ ഭാഗമാകാവുന്നതാണ്. പോളിസി ഉടമയ്‌ക്ക് മരണം സംഭവിച്ചാൽ പദ്ധതി വഴി നോമിനിക്ക് തുക ലഭിക്കും.
കുറഞ്ഞ പ്രിമീയം പ്ലാനാണിത്. എൻ‌ഡോവ്‌മെൻറ് പ്ലാൻ ആയതിനാൽ പോളിസി കാലാവധിയുടെ അവസാനത്തിൽ പോളിസി ഉടമയ്‌ക്ക് ഒരു തുക മെച്യുരിറ്റി ആനുകൂല്യമായി ലഭിക്കും. കാലാവധി പൂർത്തിയാകുമ്പോൾ അല്ലെങ്കിൽ അഞ്ച് വർഷത്തിന് ശേഷം മരണം സംഭവിക്കുമ്പോൾ ഈ പ്ലാൻ അനുസരിച്ച് ലോയൽറ്റി കൂട്ടിച്ചേർക്കൽ ലഭിക്കും. പദ്ധതി പ്രകാരം വായ്പാ സൗകര്യവുമുണ്ട്. ഗുരുതരമായ അസുഖമുള്ളവരെ പ്ലാനിൽ നിന്ന് ഒഴിവാക്കിയിട്ടുണ്ട്.
ഓഹരി വിപണിയുമായി ബന്ധിപ്പിക്കാത്ത പരമ്പരാഗത പ്ലാൻ എന്ന സവിശേഷതയും ഇതിനുണ്ട്. എട്ട് വയസ് മുതൽ പ്രായമുള്ള പെൺകുട്ടികൾക്ക് പദ്ധതിയിൽ ചേരാനാകും. 70 വയസാണ് പരമാവധി പ്രായം. പ്രതിദിനം 87 രൂപ മാത്രമാണ് നിക്ഷേപിക്കേണ്ടത്. കാലാവധി തീരുമ്പോൾ ഉപഭോക്താക്കൾക്ക് 11 ലക്ഷം രൂപ വരെ സമ്പാദിക്കാൻ കഴിയും. 75,000 രൂപ മുതൽ മൂന്ന് ലക്ഷം രൂപ വരെ അടിസ്ഥാന തുകയായി തിരഞ്ഞെടുക്കാവുന്നതാണ്. പത്ത് മുതൽ 20 വർഷം വരെ നിക്ഷേപം നടത്താവുന്നതാണ്. പോളിസി ടേമിന് സമാനമാണ് പ്രിമീയം പേയ്മെന്റ് കാലാവധി. പ്രതിമാസം, ത്രൈമാസം, അർദ്ധ വാർഷികം, വാർഷികം എന്നിങ്ങനെയുള്ള വിവിധ രീതിയിൽ പ്രീമിയം അടയ്‌ക്കാവുന്നതാണ്.
എൽഐസിയുടെ ആധാർ ശില പോളിസി പ്രകാരം വായ്പാ സൗകര്യം ലഭ്യമാണ്. പണത്തിന്റെ ആവശ്യമുണ്ടെങ്കിൽ എൽഐസി രൂപപ്പെടുത്തിയ ചില നിബന്ധനകൾക്കും വ്യവസ്ഥകൾക്കും വിധേയമായി പോളിസി കാലയളവിൽ പോളിസി ഉടമയ്‌ക്ക് പോളിസിയിൽ നിന്ന് വായ്പ ലഭിക്കും.
