മലപ്പുറം: ഇന്ത്യൻ ക്രിക്കറ്റിന്റെ ഇതിഹാസ നായകൻ എം എസ് ധോണിയുടെ ഹെലികോപ്റ്റർ ഷോട്ട് എന്നും ആരാധകർക്ക് ആവേശമാണ്. യോർക്കർ എത്തിയാലും ഒരു കൂസലുമില്ലാതെ അതിർത്തി കടത്തുന്ന ധോണിയുടെ ഈ ഷോട്ട് ആരാധകരെ തെല്ലൊന്നുമല്ല ത്രസിപ്പിച്ചത്. മലപ്പുറം സ്വദേശിയായ സപ്തയെന്ന കൊച്ചുമിടുക്കി ധോണിയെ അനുകരിച്ച് ലോകകപ്പ് സമയത്ത് കീഴടക്കുന്നത് ആരാധക ഹൃദയങ്ങൾ കൂടിയാണ്.
https://www.facebook.com/reel/2062864154049168?mibextid=kcDB8O
മലപ്പുറം പരപ്പനങ്ങാടി സ്വദേശിനിയായ ആറു വയസുകാരി സപ്ത ധോണിയുടെ ഹെലികോപ്റ്റർ ഷോട്ട് പായിച്ച് ആരാധകരെ കയ്യിലെടുക്കുകയാണ്. ബോൾ ഏത് ദിശയിലേക്ക് വന്നാലും അനായാസമായി സപ്ത ഷോട്ടുകൾ പായിക്കും. മൂന്ന് വയസ് മുതലാണ് സപ്ത ക്രിക്കറ്റിനെ സ്‌നേഹിച്ച് തുടങ്ങിയത്. ഇളയച്ചൻ വിഷ്ണുവാണ് ആദ്യമായി സപ്തയുടെ കയ്യിലേക്ക് ബാറ്റ് നൽകിയത്. കൊച്ചു കൈകളിൽ ബാറ്റ് മുറുകെപ്പിടിക്കുന്ന സപ്തയുടെ ലക്ഷ്യം ഇന്ത്യൻ ടീമിന് വേണ്ടി പാഡണിയുക എന്നതാണ്. ആ ലക്ഷ്യത്തിലേക്ക് എത്താനായുളള ചുവടുവയ്പ്പായാണ് സപ്ത ഇതിനെ കണ്ടിട്ടുളളത്.
