കണ്ണൂർ: കണ്ണൂർ ജില്ലയിലെ പയ്യന്നൂരിൽ വിദ്യാർത്ഥികൾക്ക് ക്ലാസ്മുറിയിൽ ദേഹാസ്വസ്ഥ്യം. പയ്യന്നൂർ തായിനേരി എസ് എ ബി ടി എം സ്കൂളിലാണ് സംഭവം. ഒരു കുട്ടി പെപ്പർ സ്പ്രേ പ്രയോഗിച്ചതാണ് ദേഹാസ്വാസ്ഥ്യത്തിന് കാരണമായത്. കടുത്ത ചുമയും ശ്വാസംമുട്ടലും അനുഭവപ്പെട്ട 13 കുട്ടികളെ പയ്യന്നൂരിലെ സ്വകാര്യ ആശുപത്രിയിൽ ആശുപത്രിയിൽ പ്രവേശിപ്പിച്ചു .
ഇന്ന് രാവിലെയാണ് ഒമ്പതാം ക്ലാസിലെ കുട്ടികൾക്ക് ശാരീരിക ബുദ്ധിമുട്ടുകൾ അനുഭവപ്പെട്ടത്. ഒന്നാം നിലയിൽ പ്രവർത്തിക്കുന്ന ക്ലാസ് മുറിയിൽ ടീച്ചർ എത്തുമ്പോൾ കണ്ടത് ചുമച്ച് അവശരായ വിദ്യാർത്ഥികളെയാണ്. മുറിയാകെ രൂക്ഷമായ ഗന്ധവും പരന്നിരുന്നു. കുട്ടികളെ ഉടനെ പയ്യന്നൂരിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു.
അദ്ധ്യാപകർ നടത്തിയ പരിശോധനയിലാണ് ഒരു കുട്ടിയുടെ ബാഗിൽ നിന്നും പെപ്പർ സ്പ്രേ കണ്ടെത്തിയത്. ബോഡി സ്പ്രേ ആണെന്ന് കരുതിയാണ് പെപ്പർ സ്പ്രേ ഉപയോഗിച്ചതെന്നാണ് വിദ്യാർത്ഥി പറയുന്നത്. പ്രയോഗിച്ചിതിന് ശേഷമാണ് തെറ്റ് മനസ്സിലായത് പേടിച്ചിട്ടാണ് വിവരം പുറത്ത് പറയാഞ്ഞതെന്നും വിദ്യാർത്ഥി പറയുന്നു.