ഇടുക്കി: ക്ഷേമ പെൻഷൻ ലഭിക്കാത്തതിൽ പിച്ചച്ചട്ടിയുമായി പ്രതിഷേധിച്ച മറിയക്കുട്ടിക്കും അന്നക്കുട്ടിക്കും സഹായഹസ്തവുമായി നടൻ സുരേഷ് ഗോപി. ഇരുവർക്കും ആയുഷ്‌കാല പെൻഷൻ നൽകും. എംപിയായിരുന്ന തനിക്ക് ലഭിക്കുന്ന പെൻഷനിൽ നിന്നാണ് തുക കൈമാറുകയെന്നും അദ്ദേഹം പറഞ്ഞു.
അടിമാലി ഇരുന്നൂർ ഏക്കറിലുള്ള മറിയക്കുട്ടിയുടെ വീട് സന്ദർശിച്ചാണ് സുരേഷ് ഗോപി ഇക്കാര്യം അറിയിച്ചത്. അരമണിക്കൂറോളം സമയം സുരേഷ് ഗോപി മറിയക്കുട്ടിക്കും അന്നമ്മയ്‌ക്കും ഒപ്പം ചെലവഴിച്ചു. രണ്ട് അമ്മമാരേയും ഞാനങ്ങ് എടുത്തെന്ന് പറഞ്ഞ് ഇരുവരേയും ചേർത്ത് നിർത്തി ആശ്വസിപ്പിക്കുകയും ചെയ്തു. മാദ്ധ്യമപ്രവർത്തകർ കേൾക്കാതെ മറിയക്കുട്ടിയുടെ ചെവിയിൽ തന്റെ മകളുടെ വിവാഹത്തിന് ക്ഷണിച്ചു. വിവാഹത്തിന് ഇവരെ കൊണ്ടുവരാൻ ഒപ്പം ഉണ്ടായിരുന്ന ബിജെപി ഇടുക്കി ജില്ലാ ജനറൽ സെക്രട്ടറി വിഎൻ സുരേഷിനെ ചുമതലപ്പെടുത്തി.
