എറണാകുളം: ഒരു വ്യക്തി ഒന്നിലേറെ കുറ്റകൃത്യങ്ങൾ ചെയ്തിട്ടുണ്ടെങ്കിലും അത് സമൂഹത്തിനാകെ ഭീഷണി ആകാത്ത പക്ഷം കാപ്പ ചുമത്താനാകില്ലെന്ന് ഹൈക്കോടതി. ഒരാളിൽ നിന്നും ഉണ്ടായ കുറ്റകൃത്യം മറ്റൊരു വ്യക്തിയെ മാത്രമാണ് ബാധിക്കുന്നത് എങ്കിൽ പ്രതിയെ കാപ്പ ചുമത്തി തടവിലാക്കാൻ ആകില്ലെന്നും കോടതി ചൂണ്ടിക്കാട്ടി.
പൊതുക്രമം സുരക്ഷിതമാക്കുന്നതിനാണ് ഒരു പ്രതിയെ കാപ്പ ചുമത്തി തടവിലാക്കുന്നത്. അല്ലാതെ ശിക്ഷിക്കാൻ വേണ്ടിയല്ലെന്നും ഹൈക്കോടതി വ്യക്തമാക്കി. കാപ്പ ചുമത്തി തടവിലാക്കിയ യുവാവിനെ മോചിപ്പിക്കണമെന്ന് ഉത്തരവിട്ടാണ് ഡിവിഷൻ ബെഞ്ച് ഉത്തരവ് പുറപ്പെടുവിച്ചത്.
തിരുവല്ല പോലീസ് യുവാവിനെ കാപ്പ ചുമത്തി തടവിലാക്കിയതിനെതിരെ പിതാവ് കോടതിയെ സമീപിച്ചിരുന്നു. ഒരു വ്യക്തിയുമായുള്ള പ്രശ്‌നങ്ങളുടെ അടിസ്ഥാനത്തിൽ തിരുവല്ല പോലീസ് സ്‌റ്റേഷനിൽ എട്ട് കേസ് രജിസ്റ്റർ ചെയ്തതിന്റെ പശ്ചാത്തലത്തിലാണ് യുവാവിനെതിരെ കാപ്പ ചുമത്തിയത്. ഇതിനെതിരെയാണ് ഹൈക്കോടതി ഉത്തരവിട്ടിരിക്കുന്നത്.
