കോഴിക്കോട്: പ്രസവ ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങിയ സംഭവത്തിൽ പരാതിക്കാരി ഹർഷിന വീണ്ടും സമരത്തിലേക്ക്. ഗവ. മെഡിക്കൽ കോളേജ് ആശുപത്രിയിലെ ശസ്ത്രക്രിയയ്‌ക്കിടെയായിരുന്നു ഹർഷിനയുടെ വയറ്റിൽ കത്രിക കുടുങ്ങിയത്. സംഭവത്തിൽ പ്രതികൾക്കെതിരെ സർക്കാരിന് പോലീസ് റിപ്പോർട്ട് സമർപ്പിച്ചെങ്കിലും നടപടി എടുക്കാൻ വൈകുകയാണ്. ഇതേത്തുടർന്നാണ് ഹർഷിന വീണ്ടും സമരവുമായി മുന്നിട്ടിറങ്ങുന്നത്.
ഒക്ടോബർ 28-നാണ് ശസ്ത്രക്രിയയുമായി ബന്ധപ്പെട്ട റിപ്പോർട്ട് സമർപ്പിച്ചിരുന്നത്. ദാരുണ സംഭവത്തിൽ ഉടനടി നടപടി സ്വീകരിക്കുമെന്നും ആരോഗ്യമന്ത്രി വീണാ ജോർജ് അറിയിച്ചിരുന്നു. എന്നാൽ ഇതുവരെ നടപടിയെടുത്തിട്ടില്ല. ഇനിയും സംഭവത്തിൽ നടപടി സ്വീകരിച്ചില്ലെങ്കിൽ നവകേരള സദസ്സിന്റെ അവസാന ദിവസമായ ഡിസംബർ 23-ന് സെക്രട്ടറിയേറ്റിന് മുന്നിൽ സമരം നടത്തുമെന്ന് ഹർഷിന അറിയിച്ചു.
