മമ്മൂട്ടി-അമൽ നീരദ് കൂട്ടുകെട്ടിൽ മറ്റൊരു ചിത്രം കൂടി അണിയറയിൽ ഒരുങ്ങുന്നതായി റിപ്പോർട്ട്. അടുത്ത വർഷമായിരിക്കും പുതിയ ചിത്രത്തെക്കുറിച്ചുള്ള വിവരങ്ങൾ പുറത്ത് അറിയിക്കുക. ബിഗ് ബി, ഭീഷ്മപർവ്വം എന്നീ ചിത്രങ്ങൾക്ക് ശേഷമാണ് ഇരുവരും ഒന്നിക്കുന്നത് എന്ന പ്രത്യേകതയുമുണ്ട്.
അമൽ നീരദും മമ്മൂട്ടിയും വീണ്ടും ഒന്നിക്കുന്നതായുള്ള സൂചനകൾ നേരത്തെ തന്നെ പുറത്ത് വന്നിരുന്നു. ബിഗ് ബിയുടെ രണ്ടാം ഭാഗമായ ബിലാലിന് വേണ്ടിയായിരിക്കും ഈ ഹിറ്റ് കൂട്ടുകെട്ട് വീണ്ടും ഒന്നിക്കുക എന്നതായിരുന്നു അഭ്യൂഹങ്ങൾ. എന്നാൽ, ബിലാൽ ആയിരിക്കില്ല, മറിച്ച് മറ്റൊരു സിനിമയ്‌ക്ക് വേണ്ടിയായിരിക്കും ഇരുവരും വീണ്ടും ഒന്നിക്കുന്നത്. മമ്മൂട്ടിയുടെ പുതുവർഷത്തിലെ മേജർ പ്രൊജക്ടായിരിക്കുമിതെന്നും സൂചനകളുണ്ട്.
കുഞ്ചാക്കോ ബോബൻ നായകനാകുന്ന സിനിമയാണ് അമൽ നീരദ് ഇപ്പോൾ സംവിധാനം ചെയ്യുന്നത്. ഏറെ നാളുകൾക്ക് ശേഷം നടി ജ്യോതിർമയി അഭിനയിക്കുന്നുവെന്നതും ചിത്രത്തിന്റെ പ്രത്യേകതയാണ്. വീണാ നന്ദകുമാറാണ് മറ്റൊരു താരം. ഭീഷ്മ പർവ്വം, വരത്തൻ എന്നീ ചിത്രങ്ങൾക്ക് ഛായാഗ്രഹണം നിർവഹിച്ച ആനന്ദ് സി ചന്ദ്രനാണ് പുതിയ ചിത്രത്തിനും ക്യാമറ ചലിപ്പിക്കുന്നത്.
