ഇന്ത്യൻ സിനിമയുടെ തീരാനഷ്ടമാണ് നടി ശ്രീദേവി. സിനിമാ ചരിത്രത്തിൽ തന്നെ ഇത്രയധികം ഭാഷകളിൽ അഭിനയിച്ച ഒരു നടി ഉണ്ടോ എന്ന് തന്നെ സംശയമാണ്. അമ്മയ്‌ക്ക് കിട്ടിയ അതേ സ്വീകാര്യത തന്നെയാണ് മകൾ ജാൻവിക്കും ആരാധകർ നൽകുന്നത്. ഇപ്പോഴിതാ ശ്രീദേവിയുടെ ഓർമ്മകൾ പങ്കുവെക്കുകയാണ് ജാൻവിയും ബോണി കപൂറും. കഴിഞ്ഞ ദിവസം ജാൻവി നടത്തിയ ഹോം ടൂർ വീഡിയോയിലാണ് ഇരുവരും ശ്രീദേവിയുടെ ഓർമ്മകൾ പങ്കുവെച്ചത്.
നിരവധി ആഡംബര വീടുകൾ സ്വന്തമായുള്ള ആളാണ് ബോണി കപൂർ. എന്നാൽ ശ്രീദേവിയുടെ മരണത്തിന് ശേഷമാണ് മൂന്നു പേരും മുംബൈയിലെ വീട്ടിലെത്തിയത്. അമ്മയ്‌ക്ക് ഏറ്റവും പ്രിയപ്പെട്ട വീടാണ് ഇതെന്ന് ജാൻവി പറയുന്നു. മുംബൈയിലെ ശ്രീ എന്ന് പേരുള്ള വീടിന്റെ വിശേഷങ്ങൾ ഇങ്ങനെ.. വീട് നിറയെ മുല്ലപ്പൂവിന്റെ സുഗന്ധമാണ്, അമ്മ തന്നെയാണ് വീട് നിറയെ മുല്ലച്ചെടികൾ നട്ടത്. ഒപ്പം എ.ആർ റഹ്‌മാന്റെ പാട്ടുകളും എല്ലായിപ്പോഴും നിറഞ്ഞിരിക്കുന്നു. അമ്മ ഉണ്ടായിരുന്ന സമയത്ത് എപ്പോഴും സന്തോഷമായിരുന്നു. വൈകുന്നേരങ്ങളും മനോഹരമായിരുന്നു.
അമ്മ മരിച്ചതിന് ശേഷം ഞങ്ങൾ മൂന്ന് പേരും ഒരുമിച്ചിരുന്ന് അധികം സംസാരിക്കാറില്ലായിരുന്നു. പിന്നീടാണ് ഈ വീട്ടിലെയ്‌ക്ക് വന്നത്. ഈ വീട്ടലെ ഓരോ വസ്തുക്കളും അമ്മയുടെ ഇഷ്ടാനുസരണമാണ് ഒരുക്കിയിരിക്കുന്നത്. ജീവിതത്തിൽ ഞാൻ കണ്ടിട്ടുള്ളതിൽ വച്ച് ഏറ്റവും മനോഹരമായ സ്ഥലം കൂടിയാണ് ഞങ്ങളുടെ ഈ വീട്- ജാൻവി പറഞ്ഞു.
ഈ വീട്ടിലെ മനോഹരമായ ഒന്ന് അർജ്ജുൻ കപൂർ അനിജത്തിമാർക്കും പിതാവിനുമൊപ്പമുള്ള ചിത്രമാണ്. വെള്ള, മഞ്ഞ, ഗ്രേ നിറങ്ങൾകൊണ്ടാണ് വീട് ഒരുക്കിയിരിക്കുന്നത്. ഒപ്പം ശ്രീദേവിയുടെ ചിത്രങ്ങളാണ് വീട് നിറയെ. വളരെ പ്രശാന്തമായ ഒരിടം കൂടിയാണ് തങ്ങളുടെ വീടെന്നും ജാൻവി പറയുന്നു. ഷൂട്ടിംഗ് തിരക്കുകളും മറ്റും കഴിഞ്ഞാൽ തനിക്ക് ഇവിടേയ്‌ക്ക് ഓടി വരാനുള്ള ആഗ്രഹമാണെന്നും ജാൻവി കൂട്ടിച്ചേർത്തു.
