കൊല്‍ക്കത്ത: ആഭ്യന്തര ക്രിക്കറ്റില്‍ വരവറിയിച്ച് ഷമി കുടുംബത്തിലെ രണ്ടാമന്‍. ഇന്ത്യന്‍ താരം മുഹമ്മദ് ഷമിയുടെ അനിയന്‍ മുഹമ്മദ് കൈഫാണ് വിജയ് ഹസാരെ ട്രോഫി ഏകദിന ടൂര്‍ണമെന്റില്‍ തകര്‍പ്പന്‍ പ്രകടനം പുറത്തെടുത്ത് വാര്‍ത്തകളില്‍ ഇടംപിടിച്ചത്. വിജയ് ഹസാരെ ട്രോഫിയില്‍ 2021ല്‍ ജമ്മു ആന്‍ഡ് കശ്മീരിനെതിരെ പന്തെറിഞ്ഞാണ് കൈഫ് ആഭ്യന്തര ക്രിക്കറ്റില്‍ അരങ്ങേറിയത്. ബംഗാളിനായി കളിക്കുന്ന ഇരുപത്തിയാറുകാരനായ കൈഫ് ഇത്തവണ 4 കളികളില്‍ നിന്ന് 7 വിക്കറ്റ് സ്വന്തമാക്കി.
ഗോവയ്‌ക്കെതിരെ നേടിയ മൂന്ന് വിക്കറ്റാണ് മികച്ച പ്രകടനം.3/39, 0/18,2/12,2/26,1/28 എന്നിങ്ങനെയാണ് താരത്തിന്റെ പ്രകടനങ്ങള്‍. വിജയ് ഹസാരെയില്‍ ഗ്രൂപ്പ് ഇയില്‍ 5 കളികളില്‍ നാല് ജയവും 16 പോയിന്റുമായി നിലവില്‍ ഒന്നാംസ്ഥാനത്താണ് ബംഗാള്‍. ഇത്ര തന്നെ പോയിന്റുള്ള തമിഴ്നാടിനെ നെറ്റ് റണ്‍റേറ്റില്‍ മറികടന്നാണ് ബംഗാള്‍ തലപ്പത്തെത്തിയത്. സഹോദരന്‍ ഷമിയെപ്പോലെ പേസും സ്വിംഗും ഒരുപോലെ വഴങ്ങുന്നതു തന്നെയാണ് കൈഫിന്റെയും സവിശേഷത.
താരത്തിന് എല്ലാവിധ പിന്തുണയും നല്‍കുന്ന മൂത്ത സഹോദരനായ ഷമിയാണ്. ഐപിഎല്‍ കളിക്കാനാവുമെന്ന പ്രതീക്ഷയിലാണ് മുഹമ്മദ് കൈഫ്.അതേസമയം ഏകദിന ലോകകപ്പിലെ വിക്കറ്റ് വേട്ടക്കാരനായ ഷമിയെ പരിക്ക് അലട്ടുകയാണ്. തരം ദക്ഷിണാഫ്രിക്കയ്‌ക്കെതിരെ നടക്കുന്ന ടെസ്റ്റില്‍ കളിച്ചേക്കില്ല.
