ബെംഗളൂരു: മധ്യനിരയും വാലറ്റവും കളിമറന്നതോടെ സഞ്ജുവിന്റെ തകര്‍പ്പന്‍ സെഞ്ച്വറിയും കേരളത്തെ തുണച്ചില്ല. വിജയഹസാരെ ട്രോഫിയില്‍ റെയില്‍വേസിനെതിരെ കേരളത്തിന് 18 റണ്‍സിന്റെ തോല്‍വി. 139 പന്തില്‍ 128 റണ്‍സുമായി തകര്‍പ്പന്‍ പ്രകടനം നടത്തിയെങ്കിലും ടീമിനെ വിജയ തീരത്ത് അടുപ്പിക്കാന്‍ സഞ്ജുവിന് കഴിഞ്ഞില്ല. റെയില്‍വേസ് ഉയര്‍ത്തിയ 256 റണ്‍സിന്റെ വിജയലക്ഷ്യം പിന്തുടര്‍ന്നിറങ്ങിയ കേരളത്തിന് നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 237 റണ്‍സെടുക്കാനെ സാധിച്ചുള്ളു.
ശ്രേയസ് ഗോപാല്‍ (53) നിര്‍ണായക പ്രകടനം പുറത്തെടുത്തു.അഞ്ചാം വിക്കറ്റില്‍ ഇരുവരും ചേര്‍ന്ന് 138 റണ്‍സ് പടുത്തുയര്‍ത്തി. കേരള നിരയില്‍ ഏഴുപേര്‍ രണ്ടക്കം കാണാതെ പുറത്തായി. ഗ്രൂപ്പ് ഘട്ടത്തില്‍ ഏഴ് മത്സരങ്ങളും പൂര്‍ത്തിയാക്കിയ കേരളം അഞ്ച് ജയത്തോടെ 20 പോയിന്റുമായി ഒന്നാമതാണ്.പരാജയപ്പെട്ടെങ്കിലും നോക്കൗട്ടും ഉറപ്പിച്ചു. ഇന്നത്തെ മത്സരത്തില്‍ ഒഡീഷക്കെതിരെ മുംബൈയും തോറ്റിരുന്നു. ഇതാണ് കേരളത്തിന് സഹായകമായത്.
സഹാബ് യുവരാജ് സിംഗിന്റെ (136 പന്തില്‍ പുറത്താവാതെ 121) സെഞ്ച്വറിയാണ് റെയില്‍വേസിനെ മികച്ച സ്‌കോറിലേക്ക് നയിച്ചത്. രോഹന്‍ കുന്നുമ്മല്‍ (0), സച്ചിന്‍ ബേബി (9), സല്‍മാന്‍ നിസാര്‍ (2) എന്നിവര്‍ക്ക് രണ്ടക്കം കാണാന്‍ പോലും സാധിച്ചില്ല. കൃഷ്ണ പ്രസാദ് (29) മാത്രമാണ് അല്‍പമെങ്കിലും ചെറുത്തുനിന്നത്. സഞ്ജു 6 സിക്സും എട്ടു ഫോറും നേടി. ശ്രേയസിന്റെ അക്കൗണ്ടില്‍ അഞ്ച് ബൗണ്ടറികളുണ്ട്.
