മലപ്പുറം: ടെസ്റ്റ് നടത്താതെ ലൈസൻസുകൾ പുതുക്കി നൽകിയ ആർടിഒമാർക്ക് സസ്പെൻഷൻ. തിരൂർ ജോയിന്റ് ആർടിഒ എസ്എ. ശങ്കരപിള്ള, കൊണ്ടോട്ടി ജോയിന്റ് ആർടിഒ എംഎ അൻവർ മൊയ്തീൻ എന്നിവരെയാണ് സസ്പെൻഡ് ചെയ്തത്. ട്രാൻസ്പോർട്ട് കമ്മീഷണറുടെ സ്‌ക്വാഡ് നൽകിയ റിപ്പോർട്ടിന്റെ അടിസ്ഥാനത്തിലാണ് നടപടി.
കാലാവധി തീർന്ന് ഒരു വർഷമായ ലൈസൻസുകൾ പുതുക്കുന്നത് ടെസ്റ്റ് നടത്തിയ ശേഷം മാത്രമാകണമെന്ന ഉത്തരവ് ലംഘിച്ച് അപേക്ഷകരുടെ കാലാവധിയുള്ള ഗൾഫ് ലൈസൻസും മറ്റു രേഖകളും മുഖവിലക്കെടുത്ത് പുതുക്കി നൽകിയെന്ന ട്രാൻസ്പോർട്ട് കമ്മീഷണറുടെ സ്ക്വാഡിന്റെ റിപ്പോർട്ട് പ്രകാരമാണ് ഇരുവരെയും സസ്പെൻഡ് ചെയ്തത്.
2023 ഏപ്രിൽ ഒന്നുമുതൽ സെപ്റ്റംബർ 15 വരെയുള്ള സമയത്തിനിടെ 1,370 ലൈസൻസുളാണ് എസ്.എ ശങ്കരൻപിള്ള പുതുക്കി നൽകിയത്. 2023 ജനുവരി ഒന്നുമുതൽ 2023 ഓഗസ്റ്റ് 31 വരെ, കാലാവധി കഴിഞ്ഞ 424 ലൈസൻസുകള്ളാണ് കൊണ്ടോട്ടി ജോയിന്റ് ആർടിഒ എംഎ അൻവർ മൊയ്തീൻ ടെസ്റ്റ് നടത്താതെ പുതുക്കി നൽകിയതെന്നാണ് സ്ക്വാഡിന്റെ റിപ്പോർട്ടിൽ പറയുന്നത്. എന്നാൽ നിയമം ലംഘിച്ച് യാതൊന്നും ചെയ്തിട്ടില്ലെന്നാണ് ഉദ്യോഗസ്ഥർ പറയുന്നത്.
