ന്യൂഡൽഹി: സംസ്ഥാനങ്ങളിലേക്ക് നടന്ന തിരഞ്ഞെടുപ്പുകളിൽ പാർട്ടിയുടെ പ്രകടനം വിലയിരുത്താൻ കോൺഗ്രസ് ദേശീയ നേതൃയോഗം ഇന്ന് ചേരും. എഐസിസി അദ്ധ്യക്ഷൻ മല്ലികാർജ്ജുൻ ഗാർഖെയുടെ അദ്ധ്യക്ഷതയിൽ ഡൽഹിയാണ് യോഗം. സംസ്ഥാന നേതൃത്വത്തിലെ പടലപ്പിണക്കങ്ങൾ, പരാജയ കാരണങ്ങൾ എന്നിവ യോഗത്തിൽ ചർച്ചയാകും.
ഇൻഡി മുന്നണിയിൽ സ്വീകരിക്കേണ്ട നയങ്ങളും യോഗത്തിൽ ചർച്ച ചെയ്യും. സംസ്ഥാന തിരഞ്ഞെടുപ്പുകളിലേറ്റ തിരിച്ചടി മുന്നണിയിൽ കോൺഗ്രസിന്റെ സ്വീകാര്യത കുറച്ചിട്ടുണ്ട്. രാഹുലിനെ മുന്നണിയുടെ മുഖമായി അംഗീകരിക്കാൻ സാധിക്കില്ലെന്ന് ജെഡിയും തൃണമൂലും വ്യക്തമാക്കിക്കഴിഞ്ഞു. സീറ്റ് വിഭജനത്തിലടക്കം ധാരണവേണമെന്ന് തൃണമൂൽ അറിയിച്ച സാഹചര്യത്തിൽ അതും യോഗത്തിൽ ചർച്ചയാകുമെന്നാണ് റിപ്പോർട്ടുകൾ.
രാജസ്ഥാനിലെ ഉൾപാർട്ടി പ്രശ്നങ്ങൾ, ഗെഹ്ലോട്ട്- പൈലറ്റ് പോര് എന്നിവയും യോഗത്തിൽ ഉയരും. മദ്ധ്യപ്രദേശിൽ പ്രതീക്ഷിച്ചതിലും അപ്പുറം നേരിട്ട തിരിച്ചടിയുടെ കാരണങ്ങളും ഛത്തീസ്ഗഡിലെ അപ്രതീക്ഷിത പരാജയത്തെ കുറിച്ചുള്ള നിഗമനങ്ങളും യോഗത്തിൽ ചർച്ച ചെയ്യുമെന്നാണ് വിവരം.
