അടുത്തിടെ റിസർവ് ബാങ്ക് ഓഫ് ഇന്ത്യ നോൺ കോളബിൾ ഫിക്‌സഡ് ഡിപ്പോസിറ്റുകളുടെ പരിധി 15 ലക്ഷത്തിൽ നിന്നും ഒരു കോടിയായി ഉയർത്തിയിരുന്നു. നിശ്ചിത കാലയളവിലേക്ക് ഉപയോക്താക്കൾക്ക് തിരിച്ചെടുക്കാനാകാത്ത വിധത്തിലാണ് തുക നിക്ഷേപിക്കാൻ സാധിക്കുക. കാലാവധി കഴിയാതെ തിരിച്ചെടുക്കാനാകില്ലെന്നതിനാൽ തന്നെ ഉയർന്ന പലിശ നിരക്കാണ് ഈ പദ്ധതിയിലൂടെ ഉപയോക്താക്കൾക്ക് ലഭ്യമാകുന്നത്.
സ്റ്റേറ്റ് ബാങ്ക് ഓഫ് ഇന്ത്യ ഇത്തരത്തിൽ ഉയർന്ന പലിശ വാഗ്ദാനം ചെയ്യുന്ന സ്‌കീമാണ് സർവോത്തം എന്നറിയപ്പെടുന്ന നോൺ കോളബിൾ ഫിക്‌സഡ് ഡിപ്പോസിറ്റ്. എസ്ബിഐ സർവോത്തമിൽ നിക്ഷേപിക്കുന്നതിനുള്ള ഏറ്റവും കുറഞ്ഞ തുക ഒരു കോടി രൂപയാണ്. മുമ്പ് ഏറ്റവും കുറഞ്ഞ തുക 15 ലക്ഷം രൂപയായിരുന്നു.
ഒക്ടോബർ 26-ന് പുറത്തിറക്കിയ വിജ്ഞാപനത്തിൽ ആർബിഐ പ്രധാന മാറ്റങ്ങൾ വ്യക്തമാക്കിയിട്ടുണ്ട്. എസ്ബിഐയുടെ സർവോത്തം ഡിപ്പോസിറ്റുകൾക്ക് രണ്ട് വർഷത്തെ കാലാവധിയാണെങ്കിൽ 7.4 ശതമാനം പലിശയാണ് ലഭിക്കുന്നത്. എന്നാൽ ഒരു വർഷത്തേക്ക് 7.10 ശതമാനം പലിശ ലഭിക്കും. കൂടാതെ മുതിർന്ന പൗരന്മാർക്ക് 0.50 ശതമാനം ഉയർന്ന പലിശ നിരക്ക് ലഭിക്കും. രണ്ട് വർഷത്തെ കാലാവധി പൂർത്തിയാക്കുന്ന നിക്ഷേപകരിൽ മുതിർന്ന പൗരന്മാർക്ക് 7.9 ശതമാനം പലിശ നിരക്കും ലഭിക്കുന്നതായിരിക്കും. എന്നാൽ പ്രായപൂർത്തിയാകാത്തവർക്കോ എൻആർഐ ഉപയോക്താക്കൾക്കോ ഈ സേവനം ലഭിക്കില്ല.
