മിനി സ്‌ക്രീനിലൂടെ മലയാളികൾക്ക് സുപരിചിതയായ താരങ്ങളാണ് എസ്പി ശ്രീകുമാറും സ്നേഹയും. 2019 ലായിരുന്നു ഇരുവരും വിവാഹിതരായത്. ഇപ്പോഴിതാ നാലാം വിവാഹ വാർഷികം ആഘോഷിക്കുന്ന സന്തോഷത്തിലാണ് താരദമ്പതികൾ. സ്നേഹ തന്നെയാണ് ആരാധകരോട് ഈ സന്തോഷ വാർത്ത പങ്കുവെച്ചത്. സംഭവ ബഹുലമായ നാല് വർഷങ്ങൾ അങ്ങനെ വിജയകരമായി കടന്നു പോയി എന്നായിരുന്നു വിവാഹ വാർഷികത്തിന്റെ സന്തോഷം പങ്കുവെച്ചുകൊണ്ട് താരം കുറിച്ചത്.
‘സംഭവബഹുലമായ 4 വർഷങ്ങൾ. അങ്ങനെ വിജയകരമായി മുന്നോട്ട്.. രണ്ട് സാഹചര്യങ്ങളിൽ, രണ്ട് സ്ഥലങ്ങളിൽ വളർന്ന നമ്മൾ ഓരോദിവസവും പരസ്പരം മനസിലാക്കുകയായിരുന്നു… ഇതിനിടയിൽ സങ്കടങ്ങളും സന്തോഷങ്ങളും. ‘എന്റെ’ എന്നതിൽനിന്നും ‘നമ്മുടെ’ ആയി കഴിഞ്ഞപ്പോഴാണ് ഓസ്‌കാർ സ്നേഹദൂതനെ പോലെ നമ്മുടെ ജീവിതത്തിലേക്ക് വന്നത്. അവൻ വന്ന ശേഷം നമ്മുടെ വീട്ടിൽ കൂടുതൽ സ്നേഹം നിറഞ്ഞു.. ആ സ്നേഹം എന്നും നിലനിർത്താനും കൂടുതൽ മധുരമുള്ളതാക്കാനും ഇന്ന് കേദാറും ഒപ്പമുണ്ട് .. ഇനിയും സ്നേഹവും സന്തോഷവും നിറഞ്ഞ ദിവസങ്ങൾ കേദാറിനോടും ഓസ്‌കാറിനോടും ഒപ്പം ആഘോഷമായി ജീവിക്കാൻ നമുക്ക് സാധിക്കട്ടെ… വിവാഹവാർഷിക ആശംസകൾ ശ്രീ’ എന്നാണ് സ്നേഹ കുറിക്കുന്നത്.
അതേസമയം സ്നേഹയ്‌ക്കും മകനുമൊപ്പമുള്ള ചിത്രം പങ്കുവെച്ച് കുടുംബം എന്ന് കുറിച്ചുകൊണ്ടാണ് ശ്രീകുമാർ ആശംസകൾ അറിയിച്ചത്. ഏതാനും മാസങ്ങൾക്ക് മുമ്പാണ് ഇവർക്ക് ആൺകുഞ്ഞ് പിറക്കുന്നത്. സോഷ്യൽ മീഡിയയിൽ ഏറെ സജീവമായ സ്നേഹ മകൻ കേദാറിനെ കുറിച്ചുള്ള വിശേഷങ്ങളും മുടങ്ങാതെ പങ്കുവയ്‌ക്കാറുണ്ട്.
