രാജ്യത്തെ പൗരന്മാരുടെ സമ്പാദ്യശീലം വർദ്ധിപ്പിക്കുന്നതിന് വേണ്ടി 2015-ലാണ് കേന്ദ്രസർക്കാർ സോവറിൻ ഗോൾഡ് ബോണ്ടുകൾ (എസ്ജിബി) അവതരിപ്പിച്ചത്. ഇക്കാലയളവിനുള്ളിൽ നിക്ഷേപകർക്കിടയിൽ വലിയ സ്വീകാര്യതയാണ് എസ്ബിജി പദ്ധതിയ്‌ക്ക് ലഭിച്ചത്. ഒരു ഗ്രാം സ്വർണത്തിന്റെ യൂണിറ്റുകൾ അടങ്ങിയ സർക്കാർ സെക്യൂരിറ്റിയാണ് സോവറിൻ ഗോൾഡ് ബോണ്ട് സ്‌കീം എന്ന് പറയപ്പെടുന്നത്. സാധാരണ സ്വർണം കൈവശം വയ്‌ക്കുന്നതിന് പകരമായാണ് സോവറിൻ ഗോൾഡ് ബോണ്ടുകളിൽ നിക്ഷേപകർ നിക്ഷേപിക്കുന്നത്.
സ്‌കീമിൽ അംഗത്വമെടുക്കുന്നവർ ഇഷ്യൂ വില പണമായാണ് അടയ്‌ക്കേണ്ടത്. കാലാവധി പൂർത്തിയാകുന്ന വേളയിൽ ഇവ പണമായി നിക്ഷേപകർക്ക് ലഭിക്കും. സുരക്ഷിതത്വം, ലിക്വിഡിറ്റി, നികുതി, സർക്കാർ വിശ്വാസ്യത എന്നിവ നിക്ഷേപകരെ ഈ സ്‌കീമിലേക്ക് കൂടുതൽ ആകർഷിക്കുന്നു. ഇപ്പോഴിതാ 2023-24 സാമ്പത്തിക വർഷത്തേക്കുള്ള സോവറിൻ ഗോൾഡ് ബോണ്ട് സ്‌കീം സീരിസ് മൂന്ന് ഡിസംബർ 18-ന് ആരംഭിച്ചിരിക്കുകയാണ്. അംഗത്വമെടുക്കാൻ ആഗ്രഹിക്കുന്നവർക്ക് ഡിസംബർ 22 വരെ ഇത് സാധിക്കും.
സോവറിൻ ബോണ്ടുകളിൽ നിക്ഷേപകരാകുന്നതിന് മുമ്പ് ഇതിന്റെ മാനദണ്ഡങ്ങൾ കൃത്യമായി അറിഞ്ഞിരിക്കണം. എസ്ജിബികളിലെ ഓരോ ഇഷ്യുവും അഞ്ച് വർഷത്തെ ലോക്ക് ഇൻ കാലയളവിലാണ് നിക്ഷേപകർക്ക് ലഭിക്കുന്നത്. നിക്ഷേപകരാകാൻ തയാറെടുക്കുന്നവർ പ്രധാനമായും തിരഞ്ഞെടുക്കേണ്ട കാര്യങ്ങൾ ഇവയൊക്കെ…
നിക്ഷേപം
എട്ട് വർഷമാണ് ഇതിന്റെ കാലാവധി. എന്നാൽ അഞ്ച് വർഷങ്ങൾക്ക് ശേഷം ബാധ്യതകളില്ലാതെ വിൽക്കാനാകും. ബാങ്കുകൾ, സ്റ്റോക്ക് ഹോൾഡിംഗ് കോർപ്പറേഷൻ ഓഫ് ഇന്ത്യ ലിമിറ്റഡ്, തപാൽ ഓഫീസ്, എൻഎസ്ഇ, ബിഎസ്ഇ എന്നീ സ്റ്റോക്ക് എക്‌സ്‌ചേഞ്ച് മുഖേന ബോണ്ടുകൾ വിൽക്കാനാകും.
നികുതി ഇളവ്
അഞ്ച് വർഷം നിക്ഷേപം നടത്തിയതിന് ശേഷം പലിശ അടയ്‌ക്കേണ്ട തീയതിയിൽ നിന്നും നേരത്തെ തന്നെ പിൻവലിക്കാനുള്ള ഓപ്ഷൻ ഇതിലുണ്ട്. കാലാവധി പൂർത്തിയാക്കുന്നത് വരെ കാത്തിരിക്കുകയാണെങ്കിൽ പൂർണ നികുതി ആനുകൂല്യം ലഭിക്കുന്നതായിരിക്കും. എന്നാൽ കാലാവധി തീരുന്നതിന് മുമ്പ് ആണെങ്കിൽ കൈവശം സൂക്ഷിച്ച കാലയളവ് പരിഗണിച്ചാണ് നികുതി ബാധ്യത. മൂന്ന് വർഷത്തിൽ താഴെയാണ് എസ്.ജി.ബി കൈവശം വയ്‌ക്കുന്നതെങ്കിൽ കിട്ടിയ നേട്ടത്തിനനുസരിച്ച് നികുതി സ്ലാബ് പ്രകാരം നികുതി നൽകേണ്ടതായി വന്നേക്കും. മൂന്ന് വർഷമെങ്കിലും കൈവശം വച്ച ശേഷമാണ് വിൽക്കുന്നതെങ്കിൽ ഇൻഡെക്സേഷനു ശേഷം 20 ശതമാനം നികുതി നൽകിയാൽ മതിയാകും
പലിശ നിരക്ക്
പ്രതിവർഷം 2.5 ശതമാനം പലിശ നിരക്കാണ് ലഭിക്കുന്നത്. ആറ് മാസം കൂടുമ്പോൾ പലിശ ബാങ്ക് അക്കൗണ്ടിൽ ലഭ്യമാകും. എട്ട് വർഷമാണ് ബോണ്ടിന്റെ കാലാവധി. എട്ട് വർഷങ്ങൾക്ക് ശേഷം 24 കാരറ്റ് സ്വർണത്തിന് എത്രയാണോ വിപണി മൂല്യം ഇത് തന്നെയാകും ഗോൾഡ് ബോണ്ടിന് ലഭിക്കുന്നത്.
നിരക്ക്
ഒരു ഗ്രാം, അഞ്ച് ഗ്രാം, 10 ഗ്രാം, 100 ഗ്രാം എന്നിങ്ങനെയാണ് സ്വർണ ബോണ്ട് നിക്ഷേപകർക്ക് വാങ്ങാനാകുക. ഒരു ഗ്രാം 24 കാരറ്റ് സ്വർണത്തിന് ഗോൾഡ് ബോണ്ട് അടിസ്ഥാനത്തിൽ ഒരു യൂണിറ്റിന് 6,199 രൂപയാണ് നിശ്ചയിച്ചിരിക്കുന്നത്. ഓൺലൈൻ മുഖേന നിക്ഷേപിക്കുന്നവർക്ക് ഡിജിറ്റൽ മാർഗങ്ങളിലൂടെ അപേക്ഷാ പെയ്‌മെന്റ് നടത്തിയാൽ ഗ്രാമിന് 50 രൂപ കിഴിവ് ലഭിക്കും.
