ഇന്ത്യക്കായി ഒരു കേരള താരം നേടുന്ന ആദ്യ സെഞ്ച്വറിയായിരുന്നു ഇന്നലെ ദക്ഷിണാഫ്രിക്കയിൽ പിറന്നത്. ടീം പ്രതിസന്ധിയിലായതോടെ ഉത്തരവാദിതത്തോടെ ബാറ്റു വീശിയ സഞ്ജു ഇന്ത്യയെ മികച്ച സ്കോറിലേക്ക് കൈപിടിച്ചുയർത്തി. ഇന്ത്യ വിജയിച്ച് പരമ്പരയും സ്വന്തമാക്കിയതോടെ ആ വിജയത്തിന് ഇരട്ടിമതുരമായി. ഇതിനിടെ പ്രമുഖ താരങ്ങളെല്ലാം സഞ്ജുവിന് ആശംസയുമായെത്തി. അതിൽ വേറിട്ടു നിന്നത് സഞ്ജുവിമർശകനായ ഗവാസ്കറിന്റെ പ്രശംസയായിരുന്നു.
‘ഈ ഇന്നിംഗ്സിൽ സഞ്ജുവിന്റെ ഷോട്ട് സെലക്ഷൻ മികച്ചതായിരുന്നു. മുൻ മത്സരങ്ങളിൽ നല്ല തുടക്കം ലഭിച്ചിട്ടും പെട്ടെന്ന് പുറത്താവുകയായിരുന്നു. എന്നാൽ ഇത്തവണ വലിയ വീഴ്ചകളുണ്ടായില്ല. അദ്ദേഹം തന്റെ സമയം നന്നായി ഉപയോഗിച്ചു. മോശം പന്തുകൾക്കായി കാത്തിരുന്നു. സെഞ്ച്വറി പൂർത്തിയാക്കി’.
‘ഈ സെഞ്ച്വറി സഞ്ജുവിന്റെ കരിയർ മാറിമറിക്കും. പാളിലെ സെഞ്ച്വറി സഞ്ജുവിന്റെ ആത്മവിശ്വാസം വർദ്ധിപ്പിക്കുന്നതാണ്. സഞ്ജു എത്രത്തോളം പ്രതിഭാധനനാണ് എന്ന് നമുക്കറിയാം. എന്നാൽ ചിലപ്പോഴൊക്കെ ആ മികവിനൊത്ത പ്രകടനമുണ്ടായില്ല. എന്നാൽ ഇന്നത്തെ പ്രകടനം സഞ്ജുവിന്റെ വ്യക്തിഗത നേട്ടം കൂടിയാകുന്നു’- സുനിൽ ഗവാസ്ക്കർ സ്റ്റാർസ്പോർട്സ് കമന്ററിക്കിടെ പറഞ്ഞു.
