തിരുവനന്തപുരം: ക്രിസ്തുമസ് ആഘോഷത്തിന്റെ ഭാഗമായുള്ള പുൽക്കൂട് പ്രദർശനത്തിനിടെയാണ് അപകടം. നെയ്യാറ്റിൻകര പുത്തൻകടയിലെ പ്രദർശന നഗരിയിലേക്കുള്ള താത്കാലിക പാലം തകർന്നുവീണതാണ് അപകടത്തിന് കാരണം. അപകടത്തിൽ നിരവധി പേർക്ക് പരിക്കേറ്റു. പത്തിലേറെ പേർക്കും താഴെവീണതിനെ തുടർന്നാണ് പരിക്കേറ്റിരിക്കുന്നത്.
തിരുപുറം ഗ്രാമപഞ്ചായത്തിന്റെ നേതൃത്വത്തിൽ പുറുത്തിവിള ബൈപാസ് ജംഗ്ഷനിൽ ക്രിസ്തുമസ് പുൽക്കൂട് മത്സരം നടന്നിരുന്നു. ഇതിന്റെ ഭാഗമായാണ് താത്കാലിക തടിപാലം നിർമ്മിച്ചത്. എന്നാൽ അനുവദിച്ചതിലധികം ആളുകൾ പാലത്തിൽ കയറിയതോടെ ഭാരം താങ്ങനാവാതെ പാലം ഭാഗികമായി തകർന്നുവീഴുകയായിരുന്നു.
അഗ്നിശമനസേനയും പോലീസും സ്ഥലത്തെത്തി പരിക്കേറ്റവരെ ആശുപത്രിയിലേക്ക് മാറ്റുകയായിരുന്നു. ഇവരെ നെയ്യാറ്റിൻകര താലൂക്ക് ആശുപത്രിയിലും മിംസ് ആശുപത്രിയിലും പ്രവേശിപ്പിച്ചു. രണ്ടു പേരുടെ പരിക്ക് ഗുരുതരമാണ്. ഇവരെ തിരുവനന്തപുരം മെഡിക്കൽ കോളജ് ആശുപത്രിയിലേക്കു മാറ്റിയേക്കും.
