മീററ്റ്: മദ്യപാനത്തിന്റെ പേരിൽ നിരവധി തവണ വിവാദത്തിൽ ഉൾപ്പെട്ടിട്ടുള്ള ആളാണ് ഇന്ത്യൻ മുൻ ക്രിക്കറ്റ് താരം പ്രവീൺകുമാർ. കരിയറിലും ഇത്തരം വിവാദങ്ങൾ പല തവണ താരത്തിനെതിരേ ഉയർന്നിട്ടുണ്ട്. പേസ് ഇല്ലെങ്കിലും സ്വിംഗ് ബൗളിംഗിൽ എതിരാളികളെ വിറപ്പിക്കാൻ കഴിഞ്ഞ ബൗളറാണ് പ്രവീൺകുമാർ. പ്രതിഭയുണ്ടായിരുന്നെങ്കിലും ജീവിതത്തിലെ ദുശ്ശീലങ്ങളാണ് താരത്തിന് വലിയൊരു കരിയർ ഉണ്ടാക്കാൻ കഴിയാതിരുന്നതിന് കാരണമായി ആരാധകർ പറയുന്നത്.2007-2012 കാലഘട്ടത്തില് ഇന്ത്യക്കായി ആറ് ടെസ്റ്റിലും 68 ഏകദിനത്തിലും 10 ടി20 മത്സരങ്ങളിലും കളിച്ചിട്ടുണ്ട്. ഐപിഎല്ലില് റോയല് ചലഞ്ചേഴ്സ് ബാംഗ്ലൂര്, കിങ്സ് ഇലവന് പഞ്ചാബ്, സണ്റൈസേഴ്സ് ഹൈദരാബാദ് ടീമുകള്ക്കായും പ്രവീണ് കുമാര് കളിച്ചിട്ടുണ്ട്.
ഇപ്പോൾ സച്ചിൻ ടെൻഡുൽക്കർ, എം.എസ് ധോണി, സൗരവ് ഗാംഗുലി,കുംബ്ലെ തുടങ്ങിയ ഇതിഹാസങ്ങൾക്കെതിരെ ഗുരുത ആരോപണങ്ങളുമായി രംഗത്തെത്തിയിരിക്കുകയാണ് മുൻ താരം. മദ്യപിക്കുന്നത് താൻ മാത്രമല്ലെന്നും ഇന്ത്യൻ ടീമിലെ എല്ലാവരും മദ്യപാനികളായിരുന്നുവെന്നാണ് പ്രവീണിന്റെ ആരോപണം.
‘സീനിയര് താരങ്ങള് അടക്കം എല്ലാവരും എന്നോട് പറയും മദ്യപിക്കരുത്, അത് ചെയ്യരുത്, ഇത് ചെയ്യരുത് എന്നെല്ലാം. എന്നാല് എല്ലാവരും ഇതൊക്കെ ചെയ്യും. പക്ഷെ മദ്യപാനിയെന്ന ചീത്തപ്പേര് എനിക്ക് മാത്രമായിരുന്നു. ടിവി ചാനലിന്റെ അഭിമുഖത്തിനിടെയായിരുന്നു താരത്തിന്റെ ആരോപണം. സച്ചിനും ദ്രാവിഡും ഗാംഗുലിയുമൊക്കെ ആണോ താങ്കളെ അന്ന് ഉപദേശിച്ചത് എന്ന് ചോദിച്ചപ്പോള് ക്യാമറക്ക് മുമ്പില് ആരുടെയും പേരെടുത്ത് പറയാന് ആഗ്രഹിക്കുന്നില്ലെന്നും എല്ലാവര്ക്കും അതൊക്കെ അറിയാമെന്നുമായിരുന്നു” പ്രവീണിന്റെ മറുപടി.