ലോകത്തിലെ ഏറ്റവും വലിയ മഴക്കാടായ ആമസോൺ വനങ്ങൾ അഞ്ചരക്കോടി വർഷങ്ങളായി നിലനിൽക്കുന്നവയാണ്. വൈവിധ്യങ്ങളുടെ കലവറയായ ആമസോൺ കാടുകളിൽ ഒളിഞ്ഞിരിക്കുന്ന നിഗൂഢതകൾ പലതാണെന്ന് നമുക്കറിയാം. അത്തരത്തിൽ ആമസോൺ മഴക്കാടുകളിലെ കാണാമറയത്തിരിക്കുന്ന സത്യങ്ങൾ തേടിയുള്ള ശാസ്ത്രലോകത്തിന്റെ തിരച്ചിൽ എത്തിയിരിക്കുന്നത് ആയിരം വർഷങ്ങൾക്കു മുമ്പുള്ള പുരാതന നഗരത്തിനു മുന്നിലാണ്.
ആമസോൺ മഴക്കാടുകളിൽ ഇടത്തൂർന്നു വളരുന്ന സസ്യങ്ങൾക്കിടയിൽ അധികമാരുടെയും ശ്രദ്ധയിൽപെടാതെ പോയ നഗരങ്ങളിലൊന്നാണിതെന്നാണ് ശാസ്ത്രജ്ഞർ പറയുന്നത്. പുരാവസ്തു ഗവേഷകരുടെ കണ്ടെത്തലുകൾ പ്രകാരം 2,500 വർഷങ്ങൾക്ക് മുമ്പ് നിർമ്മിച്ച നഗരമാണിത്. ഇവിടെ മനുഷ്യർ താമസിച്ചിരുന്നതിന്റെ തെളിവുകളും ശാസ്ത്രജ്ഞർ കണ്ടെത്തി.
ഇന്നു നമ്മൾ കാണുന്ന ആമസോണിയൻ സംസ്‌കാരങ്ങളെ മാറ്റികുറിക്കുന്ന രീതിയിലാണ് ഈ നഗരം പ്രത്യക്ഷപ്പെട്ടിരിക്കുന്നത്. ആമസോണിൽ വസിക്കുന്ന ആളുകൾ നഗ്നരായി ജീവിക്കുന്നവരും, മൃഗങ്ങളെ വേട്ടയാടി ചെറു ഗ്രൂപ്പുകളായി തിരിഞ്ഞ് കുടിൽ ജീവിതം നയിക്കുന്നവരുമാണ്. എന്നാൽ അതിൽ നിന്നെല്ലാം വ്യത്യസ്തമായി ആയിരം വർഷങ്ങൾക്കു മുന്നേ നാഗരികത പിന്തുടർന്ന ഒരു നഗരമാണ് ഇവിടെ കണ്ടെത്തിയതെന്ന് നാഷണൽ ഇൻവെസ്റ്റിഗേറ്റീവ് ഡയറക്ടർ പറയുന്നു.
അഗ്നിപർവ്വതത്തിന്റെ സമീപത്ത് സ്ഥിതി ചെയ്യുന്ന ഈ നഗരം ഇത് പൊട്ടിത്തെറിക്കുന്നതോടു കൂടി നശിച്ചേക്കാമെന്നും ശാസ്ത്രജ്ഞർ പറയുന്നുണ്ട്. മെക്‌സിക്കോയിലെയും മദ്ധ്യ അമേരിക്കയിലെയും മായൻ സമൂഹങ്ങളെക്കാൾ വലിയ സമൂഹങ്ങൾ ഇവിടെ വസിക്കപ്പെട്ടിരുന്നുവെന്നാണ് ശാസ്ത്രലോകത്തിന്റെ കണ്ടെത്തൽ. പ്രദേശത്തു നിന്നും അടുപ്പു കല്ലുകളും, പൊടിക്കാനുള്ള ജാറുകൾ പോലുള്ള ഉപകരണങ്ങളും, മാംസം പോലുള്ളവ അരയ്‌ക്കാനുള്ള കല്ലുകളും പല വിധത്തിലുള്ള കരിഞ്ഞ വിത്തുകളും ശാത്രജ്ഞർ കണ്ടെത്തി. ആമസോണിൽ കണ്ടെത്തിയ 300 ചതുരശ്ര കിലോമീറ്റർ വരെയുള്ള നഗരത്തിന്റെ കൂടുതൽ പ്രത്യേകതകൾ കണ്ടെത്താനുള്ള ശ്രമത്തിലാണ് ശാസ്ത്രജ്ഞർ.
