നടനും കാലിഫോർണിയ മുൻ ഗവർണറുമായി അർനോൾഡ് ഷ്വാസ്നെഗറിനെ മ്യൂണിക് വിമാനത്താവളത്തിൽ തടഞ്ഞുവച്ചു. കസ്റ്റംസ് വിഭാഗമാണ് താരത്തിനെ കസ്റ്റഡിയിലെടുത്തത്. അത്യാഢംബര വാച്ചിന്റെ പേരിലായിരുന്നു നടപടി. മൂന്നു മണിക്കൂറിന് ശേഷം താരത്തെ വിട്ടയച്ചു. അമേരിക്കയിൽ നിന്ന് എത്തിയപ്പോഴാണ് താരത്തിന് പുലിവാല് പിടിച്ചത്. ബാഗുകൾ പരിശോധിക്കുമ്പോഴാണ് കസ്റ്റംസ് അധികൃതർ വാച്ച് കണ്ടെത്തുന്നത്.
താരത്തെ വിട്ടെങ്കിലും ലക്ഷ്വറി വാച്ച് വിട്ടുനൽകാൻ അധികൃതർ തയാറായില്ല. ഏതു താരമായാലും നികുതി അടച്ചതിന് ശേഷം വിട്ടുനൽകുമെന്നാണ് അവരുടെ നിലപാട്. 23.56 ലക്ഷത്തിന്റെ Audemars Piguet ബ്രാൻഡ് വാച്ചാണ് താരത്തിന് പണി നൽകിയത്.
കാലാവസ്ഥ വ്യതിയാനവുമായി ബന്ധപ്പെട്ടുള്ള പ്രശ്നങ്ങൾക്ക് ഫണ്ട് കണ്ടെത്താനായി ലേലത്തിന് വയ്‌ക്കാൻ കൊണ്ടുവന്നതാണ് വാച്ച്. താരത്തിന് ഒരു ഓസ്ട്രിയൻ റിസോർട്ടാണ് ഇത് സമ്മാനിച്ചിരുന്നത്. കസ്റ്റംസ് ഫോമിൽ ഈ വാച്ചിനെക്കുറിച്ച് വ്യക്തമാക്കിയിരുന്നില്ല. ഇതാണ് താരത്തിന് കെണിയായത്. പെനാൽറ്റിയടക്കം 31.72 ലക്ഷം രൂപയാണ് താരത്തിന് പിഴയിട്ടത്.
