സിനിമാ പ്രേമികളെ പിടിച്ചു കുലുക്കി മലൈക്കോട്ടൈ വാലിബന്റെ ട്രെയിലർ. പ്രതീക്ഷകൾ വാനോളം ഉയർത്തിയാണ് രാജസ്ഥാന്റെ മണ്ണിൽ നിന്നും യോദ്ധാവ് വന്നിറങ്ങിയിരിക്കുന്നത്. ചിത്രം തിയറ്റുകളിൽ ആവേശത്തിന്റെ പൊടി പറത്തുമെന്ന് ഉറപ്പു തരുന്ന ട്രെയിലറാണ് അണിയറ പ്രവർത്തകർ പുറത്തുവിട്ടിരിക്കുന്നത്. മോഹൻലാലിന്റെ ഇതുവരെ കാണാത്ത അത്ഭുതം പ്രകടനം തന്നെ ചിത്രത്തിൽ പ്രതീക്ഷിക്കാം. ലിജോ ജോസ് പെല്ലിശ്ശേരിയുടെ അത്യുഗ്രൻ മേക്കിംഗും മികവുറ്റ ഛായാഗ്രഹണവും കിടിലം കൊള്ളിക്കുന്ന ബിജിഎമ്മും ത്രസിപ്പിക്കുന്ന ആക്ഷൻ രംഗങ്ങളും കോർത്തിണക്കി കൊണ്ടുള്ള അതിഗംഭീര ട്രെയിലർ തന്നെയാണ് റിലീസ് ചെയ്തിരിക്കുന്നത്.
ജനുവരി 25-നാണ് ചിത്രം തീയേറ്ററുകളിലെത്തുന്നത്. രണ്ടു മണിക്കൂർ ഏഴ് മിനിറ്റാണ് മലൈക്കോട്ടൈ വാലിബന്റെ ദൈർഘ്യം. ഒരു യോദ്ധാവായാണ് മോഹൻലാൽ പ്രത്യക്ഷപ്പെടുന്നത്. ഒരു നാടോടിക്കഥ പോല പറഞ്ഞു പോകുന്ന ചിത്രം മലയാള സിനിമ ഇന്ന് വരെ കണ്ടിട്ടില്ലാത്ത തരത്തിലുള്ളതായിരിക്കും എന്ന മോഹൻലാലിന്റെ വാക്കുകൾക്ക് കരുത്ത് പകരുന്നതാണ് ട്രെയിലർ. ഇന്ത്യൻ സിനിമയിൽ ഇന്ന് വരെ ഉണ്ടായിട്ടില്ലാത്ത വലിയൊരു കാൻവാസിൽ ചെയ്തിരിക്കുന്ന സിനിമയെന്ന് ട്രെയിലർ ഉറപ്പ് നൽകുന്നു.
സെൻസറിംഗ് പൂർത്തിയായ സിനിമയ്‌ക്ക് യു/എ സർട്ടിഫിക്കറ്റാണ് ലഭിച്ചിരിക്കുന്നത്. മോഹൻലാലിനെ കൂടാതെ സൊണാലി കുൽക്കർണി, ഹരീഷ് പേരടി, ഡാനിഷ് സെയ്ത്, മനോജ് മോസസ്, കഥ നന്ദി, മണികണ്ഠൻ ആചാരി തുടങ്ങി നിരവധി താരങ്ങൾ ചിത്രത്തിൽ അണിനിരക്കുന്നു. പി.എസ് റഫീക്കിന്റേതാണ് തിരക്കഥ. ജോൺ ആൻഡ് മേരി ക്രിയേറ്റിവിസ്, സെഞ്ച്വറി ഫിലിംസ്, മാക്സ് ലാബ്, സരിഗമ ഇന്ത്യാ ലിമിറ്റഡ് എന്നിവർ ചേർന്നാണ് ബ്രഹ്മാണ്ഡ ചിത്രം നിർമ്മിച്ചിരിക്കുന്നു.
