ന്യൂഡൽഹി: സുശക്തമായി അതിർത്തികൾ. ചൈനയുടെ അതിർത്തികളിലെ സുരക്ഷ ശക്തമാക്കുന്നതിനായി നിയന്ത്രണ രേഖയിലെ അടിസ്ഥാന സൗകര്യങ്ങൾ ഇന്ത്യ അതിവേഗം വർദ്ധിപ്പിക്കുകയാണ്. അതിർത്തിയിൽ ചൈന നടത്തുന്ന നിർമ്മാണ പ്രവർത്തനങ്ങൾക്ക് ബദലാകുകയാണ് ഇന്ത്യയുടെ നീക്കം. ഇതിനായി നിരവധി പദ്ധതികളാണ് കേന്ദ്രം മുന്നോട്ടുവെക്കുന്നത്. വൻ വികസന പദ്ധതികളാണ് നിലവിൽ പൂർത്തിയായിരിക്കുന്നത്. ഇതിന്റെ ഉദ്ഘാടനം നാളെ കേന്ദ്ര പ്രതിരോധ മന്ത്രി രാജ്‌നാഥ് സിംഗ് നിർവഹിക്കും.
ഉത്തരാഖണ്ഡിലെ ചമോലിയിൽ ഇന്ത്യ-ചൈന അതിർത്തിയെ ബന്ധിപ്പിക്കുന്ന ജോഷിമഠ്-മലരി ഹൈവേയിൽ ധക് ഡ്രെയിനിനു കുറുകെയുള്ള സ്റ്റീൽ ഗർഡർ പാലം പൊതുജനങ്ങൾക്കായി തുറന്നുകൊടുക്കും. റിംഖിം ആക്‌സിസ്, നിതിപാസ്, സുമ്‌ന-ലാപ്താൽ-തോപിഡുംഗ റോഡ് എന്നിവിടങ്ങളിലെ അതിർത്തിയിലേക്ക് നമ്മുടെ സായുധ സേനയ്‌ക്ക് കണക്റ്റിവിറ്റി നൽകുന്നതിനാൽ ധക് പാലത്തിന് തന്ത്രപരമായ പ്രാധാന്യം ഉണ്ട്. പാലം പ്രവർത്തനക്ഷമമാകുന്നതോടെ സൈന്യത്തിന്റെയും ഐടിബിപി ഉദ്യോഗസ്ഥരുടെയും അതിർത്തി പ്രദേശത്തെ ഗ്രാമീണരുടെയും സഞ്ചാരം എളുപ്പമാകും. പ്രതിരോധമന്ത്രി രാജ്‌നാഥ് സിംഗ് നാളെ പാലം ഉദ്ഘാടനം ചെയ്യും. ഈ പാലത്തോടൊപ്പം, ആറ് റോഡുകളും 29 പാലങ്ങളും ഉൾപ്പെടെ ബിആർഒ നിർമ്മിച്ച മറ്റ് 34 ഇൻഫ്രാ പ്രോജക്ടുകളും അദ്ദേഹം ഉദ്ഘാടനം ചെയ്യും.
ഈ ഇൻഫ്രാ പ്രോജക്ടുകളിൽ 11 പദ്ധതികൾ ജമ്മു കശ്മീരിലും ഒമ്പത് എണ്ണം ലഡാക്കിലും എട്ടെണ്ണം അരുണാചലിലും മൂന്നെണ്ണം ഉത്തരാഖണ്ഡിലും സിക്കിമിലും രണ്ടെണ്ണം മിസോറാമിലും ഹിമാചൽ പ്രദേശിലുമാണ്. ജമ്മു കശ്മീരിലെ നിർണായക അടിസ്ഥാന സൗകര്യ പദ്ധതിയായ രാഗിണി-ഉസ്താദ്-ഫാർക്കിയൻ ഗലി റോഡും ഉദ്ഘാടനം ചെയ്യും.
